महाधिवेशन विशेष

एमाले महाधिवेशनमा चुनावी माहोल [तस्बिरहरु]

निमेष जंग राई सोमबार, मंसिर १३, २०७८ १०:३९

चितवन- नेकपा एमालेको दशौं महाधिवेशन अन्तर्गत जारी बन्दसत्रमा उम्मेदवारी दर्ताको समय सकिएको छ। सोमबार विहान उम्मेदवारी दर्ताका लागि १० बजेसम्मका लागि समय छुट्याइएको थियो।

आइतबार दिनभर लगाएर राति ३ बजेपछि सार्वजनिक सूचीमा असन्तुष्टि दर्शाउँदै नेताहरुले उम्मेदवारी दिएका हुन्।

अध्यक्षमा केपी शर्मा ओली, भीम रावलबीच प्रतिस्पर्धा हुने भएको छ। उपाध्यक्षमा घनश्याम भुसालले उम्मेदवारी दिएका छन्। सचिवमा भीम आचार्य, टंक कार्कीले उम्मेदवारी दिएका छन् भने यसअघि ओलीको सूचीमा अटाएका उपाध्यक्ष र सचिवहरुले पनि उम्मेदवारी दर्ता गराएका छन्।

अब उम्मेदवारको प्रारम्भिक नामावली प्रकाशन गरिने निर्वाचन आयोगका प्रमुख विजय सुब्बाले जानकारी दिए। बिहान १०: ३० देखि १०: ४५ बजेसम्म उम्मेदवारको विरोधमा उजुरी दिन सकिनेछ भने १०: ५० बजे उजुरीउपर छानबिन र निर्णय हुने कार्यतालिका रहेको छ।

यस्तै बिहान ११: ५५ देखि १२ बजेसम्म उम्मेदवारलाई उम्मेदवारी फिर्ताको समय दिइनेछ। दिउँसो १२: ५ बजे उम्मेदवारको अन्तिम नामावली प्रकाशन हुने र राति ९ बजेदेखि मात्रै मतदान सुरु हुने कार्यतालिका रहेको छ। मतदानको समय मङ्गलबार बिहान ३ बजेसम्म तोकिएको छ। मतदान सकिएपछि मतगणना हुनेछ।