काठमाडौं– गायक योगेश्वर अमात्यको जग्गाको नक्कली लालपूर्जा बनाएर १९ करोड रुपैयाँ ऋण लिएको घटनाको अनुसन्धान बैंकिङ कसुरअन्तर्गत गर्नुपर्ने भन्दै जिल्ला सरकारी वलिक कार्यालयले फाइल फिर्ता गरेको छ।
केन्द्रीय अनुसन्धान ब्यूरो (सीआईबी)ले नक्कली लालपूर्जा बनाएर ऋण लिएको भन्दै लिखतसम्बन्धी कसुरअन्तर्गत कीर्तेमा मुद्दा चलाएको थियो। सरकारी कागजात कीर्तेमा अनुसन्धान सकेर सोही अनुसार मुद्दा चलाउनुपर्ने भन्दै सीआईबीले उक्त फाइल सरकारी वकिल कार्यालयमा पेश गरेको थियो।
सरकारी वकिल कार्यालयले कीर्तेसँगै यो प्रकरण बैंकिङ कसुरमा पनि जोडिएकाले त्यसतर्फ पनि अनुसन्धान गर्नु भन्दै फाइल फिर्ता गरेको हो। सीआईबीले पेश गरेको फाइल अनुसन्धान गरेपछि सरकारी वकिल कार्यालयले सोमबार फाइल फिर्ता गरेको स्रोतले नेपाल लाइभलाई जानकारी दियो।
गायक अमात्यको बाराको विश्रामपुरमा बिरुवा भूमि वनकाली कम्पनीको नाममा रहेको १२ बिघा जग्गाको नक्कली कागजात बनाएर उक्त जग्गा धितो राखेर काठमाडौं न्यूरोडस्थित कुमारी बैंकको शाखाबाट १९ करोड रुपैयाँ ऋण निकालिएको थियो।
बैंकले गत भदौमा उक्त जग्गा अर्कैको नाममा रहेको जानकारी पाएपछि सुटुक्क धितो परिवर्तन गर्न लगाएर आफ्नो ऋणसमेत उठाइसकेको थियो। यो विषय गायक अमात्यले जानकारी पाएपछि सीआईबीमा उजुरी दिएका थिए।
त्यसपछि सीआईबीले पर्सास्थित कुमारी बैंक शाखाका ऋण अधिकृत सोनु ठाकुर, मूल्याङ्कनकर्ता राजेश चौरसिया, काठमाडौंका एसके महर्जन, मुक्तिलाल गौतम र अर्का बिचौलिया कुसुम प्रधानलाई पक्राउ गरेको थियो । बैंकको पर्सा शाखाकै सहायक म्यानेजर राजेश साह, गिरोहकी सदस्य शोभा श्रेष्ठसहितका व्यक्ति भने फरार थिए । उनीहरुलाई फरार प्रतिवादी बनाएर सिआइबीले अनुसन्धान फाइल सकारी वकिल कार्यालयमा बुझाएको थियो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
