काठमाडौं– भूमिसम्बन्धी ऐन, २०२१ मा जग्गाको हदबन्दीका बारेमा उल्लेख छ। ऐनको दफा ७ अनुसार व्यक्ति तथा संस्थाका लागि पहाडमा ७० रोपनी, उपत्यकामा २५ रोपनी र भित्री मधेस तथा तराईंमा १० बिघा (१३५ रोपनी) हदबन्दी तोकिएको छ। जसकारण १० बिघाभन्दा बढी जग्गा नटुक्र्याइ किनबेच गर्न मिल्दैन।
गायक योगेश्वर अमात्यको बाराको विश्रामपुरमा बिरुवा भूमि वनकाली कम्पनीको नाममा १२ बिघा जग्गा रहेको विषय घरजग्गाको कारोबार गर्ने कसुन प्रधानसहितको समूहले जानकारी पाएको थियो। १२ बिघा जग्गा एकैपटक बेच्न नमिल्ने र टुक्र्याएर बेच्दा लामो प्रक्रिया लाग्ने, अर्कोतर्फ ‘यो जग्गा बिक्रिमा छैन’ भनेर बोर्ड नै बनाएर राखेकाले तत्काल कारोबार नहुने हुँदा सुरक्षित ठानेर गायक अमात्यको जग्गाको नक्कली कागजात बनाइ कर्जा लिएको देखिएको केन्द्रीय अनुसन्धान ब्यूरो (सीआईबी) का अनुसन्धान अधिकारीले बताएका छन् ।
सीआईबीका अनुसन्धान अधिकारी भन्छन्, ‘नक्कली कागजात बनाएकै भरमा बिना धितो १९ करोड रुपैयाँ वर्षौं चलाउन पाइने, त्यसका लागि अमात्यको जग्गा सुरक्षित देखेपछि नक्कली कागजात बनाएर कारोबार गरेको देखिन्छ।’
यो कारोबारमा अमात्यको जग्गाको बारेमा राम्रो जानकार भएका व्यक्तिले सबै सूचना दिएपछि मात्रै सम्भव भएको र उनीहरु अहिले फरार भएको सीआईबी स्रोतले नेपाल लाइभलाई बतायो।
मूल्यांकनकर्ता पक्राउ पर्दा स्वीकृतकर्तालाई उन्मुक्ति दिएर फाइल पेस!
गायक योगेश्वर अमात्यको जग्गाको नक्कली लालपूर्जा बनाएर १९ करोड रुपैयाँ निकालिएको प्रकरणमा मूल्यांकनकर्ता पक्राउ पर्दा कर्जा स्वीकृतकर्ताले भने उन्मुक्ति पाएका छन्।
मूल्यांकनकर्ता पक्राउ पर्दा कर्जा स्वीकृत गर्ने काठमाडौंस्थित न्यूरोड शाखाका कर्मचारीदेखि बैंकको केन्द्रीय कार्यालय नक्सालसम्मका कर्मचारीमाथि सामान्य सोधपुछ मात्रै भएको पाइएको छ। जबकि १ करोड रुपैयाँ भन्दा बढी कर्जाका लागि केन्द्रीयकार्यालयबाट स्वीकृत लिनुपर्ने प्रावधान छ। अमात्यको जग्गा राखेर १९ करोड कर्जा लिने बेलामा पनि कागजात केन्द्रीय कार्यालयसम्म पुगेको थियो। नक्सालस्थित केन्द्रीय कार्यालयका कर्मचारीले समेत स्वीृकत गरेपछि बल्ल १९ करोड कर्जा प्रवाह भएको थियो। तर, नक्कली कागजातलाई स्वीकृत गर्ने केन्द्रीय कार्यालयका कर्मचारी भने अहिलेसम्म कानूनी दायरामा आउन सकेका छैनन् ।
उनीहरुलाई उन्मुक्ति दिएर केन्द्रीय अनुसन्धान ब्यूरो (सीआईबी)ले फाइल पेस गरेको छ। पक्राउ परेको २१ दिनमा यस प्रकरणको अनुसन्धान सकेर सीआईबीले जिल्ला सरकारी वकिल कार्यालयमा रायसहितको अनुसन्धान फाइल पेस गरेको छ । उक्त फाइलमा लिखत सम्बन्धी कसुरको सरकारी कागजात कीर्ते कसुरमा कुमारी बैंकको पर्सा शाखाका ऋण अधिकृत सोनु ठाकुर, मूल्याङ्कनकर्ता राजेश चौरसिया, काठमाडौंका एसके महर्जन, मुक्तिलाल गौतम र अर्का बिचौलिया कुसन प्रधानलाई विपक्षी बनाउँदै पेस गरेको हो।
त्यसैगरी पर्सा शाखाकै सहायक म्यानेजर राजेश साह, शोभा श्रेष्ठसहति चार जनालाई फरार प्रतिवादी बनाइएको छ। तर, न्यूरोड शाखा र केन्द्रीय कार्यालय नक्सालका कर्मचारी भने प्रतिवादी छैनन्।
स्रोतका अनुसार बैंकका सिइओ अनुजमणि तिमिल्सिनालाई सीआईबीले कार्यालयमै बोलाएर दुईपटक सामान्य सोधपुछ गरेर छाडेको थियो। त्यसबाहेक कुमारी बैंकका अन्य कर्मचारीमाथि प्रहरीले अनुसन्धान गरेको छैन। सीआईबीका निर्देशक, डिआइजी धीरजप्रताप सिंह भने बैंकमाथि पनि अनुसन्धान गर्दा केही नदेखिएको बताउँछन्। ‘हामीले बैंकमाथि पनि अनुसन्धान गर्यौं तर, पर्सा शाखाका कर्मचारी बाहेक अन्य व्यक्तिको गल्ती देखिएन’, डिआइजी सिंहले नेपाल लाइभसँग भने ।
सबै कागजात नक्कली !
गायक अमात्यको बाराको विश्रामपुरमा बिरुवा भूमि वनकाली कम्पनीको नाममा रहेको १२ बिघा जग्गा एके र मुक्तिलालले आफ्नो कम्पनी डेनियलको नाममा ल्याउने क्रममा सम्पूर्ण कागजात नक्कली बनाएको पाइएको थियो। राजीनामा पासदेखि मालपोतबाट जग्गा रोक्का, लालपूर्जा, स्थानीय प्रतिनिधिसहितको रोहबरको जग्गाको चारकिल्लाको विवरणलगायत सबै कागजात नक्कली बनाएको पाइएको सीआईबीले उल्लेख गरेको छ।
विभिन्न प्रपञ्च रचेर नक्कली कागजात राखी कर्जा निकाल्ने योजना वैशाखबाटै बनेको पाइएको छ। त्यसपछि जेठमा उनीहरुले ऋण निकाल्न कुमारी बैंकको न्यूरोड शाखामा प्रस्ताव बुझाएका थिए।
त्यसपछि साउन १० गतेको मिति राखेर राजीनामा पास भएको नक्कली कागजात बनाइएको देखिन्छ। उक्त १२ बिघा जग्गाको भ्यालुएसन कसुन प्रधानको डाइनामिक कम्पनीबाट भएको पनि खुलेको छ। उनले ३९ करोड रुपैयाँ भ्यालुएसन गरेका थिए।
त्यस्तै मालपोतमार्फत जग्गा रोक्का भएको कागजात समेत नक्कली बनाएको पाइएको छ। कुमारी बैंकका सिइओ अनुजमणि तिमिल्सिनाको समेत नक्कली बनाएको अनुसन्धानमा खुलेको छ। यद्यपी हाल पक्राउ परेका बैंकका कर्मचारीले भने मालपोत कार्यलयमै गएर सहीछाप गरेकाले मालपोतबाटै गल्ती भएको दाबी गरेका छन्।
जग्गा रोक्काको कागजात नक्कली वा सक्कली भन्ने विषयमा बाराको मालपोत कार्यालयको छापसँग मेल खाने/नखाने पुष्टि गर्न जाँचका लागि केन्द्रीय विधि विज्ञान प्रयोगशालामा पठाइएको सीआईबी स्रोतले जानकारी दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1769055728.png)
-1764146706.png)
