काठमाडौं- तालिबान लडाकुले राजधानी काबुलमा सैन्य परेड गरेका छन्। आइतबार उनीहरुले अमेरिकामा बनेका हातहतियारसहित सैन्य परेड गरेका हुन्।
तालिबान लडाकुले आफ्नो सैन्य परेडमा रुसी हेलिकोप्टरसमेत प्रदर्शन गरेको बताइएको छ। विद्रोही सेनाबाट नियमित स्थायी सेना भएका उनीहरूले निरन्तर रूपान्तरण सैन्य परेड देखाउँदै आएका छन्।
करिब २० वर्ष लामो समयसम्म अफगानिस्तानमा तैनाथ अमेरिकी सेना गत अगष्टमा फिर्ता भएको थियो। अगष्ट महिनामा अमेरिकी सेनासँगै खटिएका पश्चिमा मुलुकका सेनाको स्वदेश फिर्तीसँगै सेनाले ठूलो संख्यामा हातहतियार अफगानिस्तानमा छोडेका थिए।
रक्षा मन्त्रालयका प्रवक्ता इनयतुल्लाह खवराज्मीले आफ्ना २५० नयाँ लडाकुलाई प्रशिक्षण दिन सैन्य परेड गरेको बताए। तालिबानले अहिले प्रयोग गरिरहेका अधिकांश हतियार र उपकरणहरू अमेरिकाले आफू समर्थित सरकारलाई तालिबानसँग लड्न र अफगान राष्ट्रिय सेना निर्माण गर्न आपूर्ति गरेका हुन्।
अफगानिस्तानका राष्ट्रपति असरफ घानी भागेपछि कतिपय सेनाहरूले पनि देश छाडेर भागेका थिए। अफगानिस्तानमा रहेका केही सेनाहरुबाट भने तालिबानले हतियार खोसेको थियो। यद्यपि, उनीहरुलाई नयाँ बलमा एकीकृत गरिने तालिबानले जनाएको छ।
'पूर्व अफगान राष्ट्रिय सेनाका पाइलटहरू, मेकानिकहरू र अन्य विशेषज्ञहरूलाई नयाँ बलमा एकीकृत गरिनेछ, जसले अफगानी पोशाकको सट्टामा परम्परागत सैन्य वर्दी लगाउन थालेको छ,' तालिबानले भनेको छ।
अफगानिस्तान पुनर्निर्माणका लागि विशेष महानिरीक्षक (सिगर)ले गत वर्षको अन्तमा
सार्वजनिक गरेको एक प्रतिवेदन अनुसार अमेरिकी सरकारले अफगान सरकारलाई हतियार, गोला बारुद, सवारी साधन, रात्रि भिजन उपकरणसहित २८ बिलियन डलरभन्दा बढी मूल्यको रक्षा सामग्री हस्तान्तरण गरेको छ।
केही विमानहरू अफगान सेनाले भाग्ने क्रममा छिमेकी मध्य एसियाली देशहरूमा उडाइएका थिए, तर तालिबानले अन्य विमानहरू विरासतमा लिएका छन्। कति सञ्चालित छन् भन्ने यकिन हुन सकेको छैन।
अमेरिकी सेनाहरू काबुलको हमिद करजाई अन्तर्राष्ट्रिय विमानस्थलबाट उड्नु अघि ७० भन्दा बढी विमानहरू, दर्जनौं सशस्त्र सवारी साधनहरू र असक्षम हवाई सुरक्षाहरू नष्ट गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
