काठमाडौं। बाढी र पहिरोका कारण रसुवा, मनाङ र म्याग्दीका मुख्य सडक खण्ड पूर्ण रूपमा अवरुद्ध भएका छन्।
प्रहरीका अनुसार रसुवा र नुवाकोट हुँदै रसुवागढी जाने पासाङ ल्हामु राजमार्गको ठूलो भाग त्रिशूली नदीको कटानमा परेपछि सडक बन्द भएको छ। मनाङको बेंसीसहर–खाङसार र म्याग्दीको बेनी–जोमसोम सडक खण्ड पनि अवरुद्ध भएका छन्।
२०८३ भदौ १० गते आएको बिनाशकारी बाढीका कारण त्रिशूली बजार र बेत्रावती बजार हुँदै रसुवागढी नाकासम्म जाने पासाङ ल्हामु राजमार्गको त्रिशूली नदी किनारको अधिकांश भाग कटानमा परेको प्रहरीले जनाएको छ।
राजमार्ग पूर्ण रूपमा अवरुद्ध भए पनि स्याफ्रुबेंसीसम्म पुग्न वैकल्पिक बाटो प्रयोग गर्न सकिने प्रहरीले जनाएको छ। काठमाडौं–टोखा–छहरे हुँदै विदुर, नुवाकोट दरबार, फलाँटे, चोकदे, लच्याङ, सरमथली, पार्च्याङ, भोर्ले, ० किलोमिटर, कालिकास्थान, स्याउबारी, राम्चे, सोले, धुन्चे हुँदै स्याफ्रुबेंसी पुग्न सकिनेछ। यो वैकल्पिक मार्ग एक लेनको कच्ची सडक हो।
मनाङमा २०८३ असोज ९ गते बिहान ६ः३० बजेदेखि बेंसीसहर हुँदै खाङसार जाने सडक पूर्ण रूपमा अवरुद्ध भएको छ। रातिदेखि परेको अविरल वर्षाका कारण बाढी आएपछि जिल्लाका सडक खण्ड अवरुद्ध भएको प्रहरीले जनाएको छ।
म्याग्दीमा २०८३ असोज १० गते बिहान ५ः५० बजे रघुगंगा गाउँपालिका–२ बैसरीमा सडक माथिबाट लेदोमाटोसहितको पहिरो खसेपछि बेनी–जोमसोम सडक खण्ड पूर्ण रूपमा अवरुद्ध भएको छ।
प्रहरीका अनुसार पहिरो खसेपछि उक्त सडकमा यातायात सञ्चालन हुन सकेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
