नयाँ दिल्ली- भारतमा कोरोना भाइरसबाट सङ्क्रमित भएका सक्रिय सङ्क्रमितको सङ्ख्या निकै कम हुँदै गएको देखिएको छ।
सरकारी अधिकारीले सोमबार दिएको जानकारीअनुसार भारतमा अहिले सन् २०२० को मार्चपछिकै सबैभन्दा थोरै सक्रिय सङ्क्रमित रहेका छन्। उनीहरुका अनुसार भारतमा अहिले सङ्क्रमित अवस्थामै रहेकाको कूल सङ्ख्या एक लाख ३४ हजार ९६ रहेका छन्।
'कूल सङ्क्रमितमध्ये अहिले एक प्रतिशतभन्दा कममात्रै सक्रिय सङ्क्रमित रहेका छन्, यो सङ्ख्या पछिल्ला ५२३ दिन अर्थात् १७ महिनापछिकै सबैभन्दा कम हो,' केन्द्रीय स्वास्थ्य मन्त्रालयको वक्तव्यमा उल्लेख छ।
त्यसैगरी पछिल्लो २४ घण्टामा भारतमा १० हजार २२९ जना नयाँ सङ्क्रमित थपिएको पनि मन्त्रालयले जनाएको छ। यससँगै भारतमा कूल सङ्क्रमितको संख्या तीन करोड ४४ लाख ४७ हजार ५३६ पुगेको मन्त्रालयले दिएको पछिल्लो जानकारीमा उल्लेख छ।
गत २४ घण्टामा कोरोना भाइरस सङ्क्रमणका कारण थप १२५ जनाको मृत्यु भएको छ। यससँगै भारतमा कोरोना सुरु भएबाट हालसम्म यसको सङ्क्रमणबाट मृत्यु हुने व्यक्तिको संख्या चार लाख ६३ हजार ६५५ रहेको बताइएको छ।
भारतमा गत २४ घण्टामा ११ हजार ९२६ जना कोरोनाबाट मुक्त भएका छन्। यससँगै भारतमा कोरोना भाइरस सुरु भएयता हालसम्म कोरोनामुक्त भएकाको संख्या तीन करोड ३८ लाख ४९ हजार ७८५ पुगेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782563266.png)
-1764146706.png)
