काठमाडौं- भारतको उत्तर प्रदेशमा समाजवादी पार्टीको सरकारमा खानीमन्त्री रहेका गायत्री प्रजापति र उनका दुई सहयोगीलाई बलात्कारको मुद्दामा जन्मकैदको सजाय सुनाइएको छ।
शुक्रबार लखनउको ‘एमपी-एमएलए अदालत’का विशेष न्यायाधीश पवनकुमार राईले उक्त फैसला सुनाएका हुन्।
दोषी ठहर भएका सबैलाई २/२ लाख रुपैयाँ जरिवाना पनि तोकिएको छ। जरिवानाको रकम पीडित महिलाको पुनस्र्थापनामा खर्च गरिने छ।
अखिलेश यादवको सरकारमा खानीमन्त्री हुँदा गायत्री प्रजापति र उनका अन्य सहयोगीहरू चित्रकूटकी एक महिलालाई सामूहिक बलात्कार र उनकी नाबालिग छोरीलाई बलात्कार गर्ने प्रयास गरेकोमा सामूहिक बलात्कार र पोक्सो ऐनअन्तर्गत दोषी ठहर भएका हुन्।
बुधबार यो फैसला सुनाउँदै अदालतले प्रजापतिका अन्य दुई सहयोगी आशिष शुक्ला र अशोक तिवारीलाई पनि दोषी ठहर गरेको छ। आशिष र अशोक दुवैलाई जन्मकैदको सजाय सुनाइएको छ।
तर, अदालतले तीन जनालाई दोषी ठहर गर्दै प्रजापतिका अन्य सहयोगी अमरेन्द्र सिंह उर्फ पिन्टु, चन्द्रपाल र रुपेश्वर उर्फ रुपेशलाई भने सफाइ दिएको छ। चन्द्रपाल प्रजापतिका अंगरक्षक थिए र अन्य सबै अभियुक्त उनका नजिकका सहयोगी हुन्। जसमाथि महिलाले सामूहिक बलात्कारको आरोप लगाएकी थिइन्।
सन् २०१७ को लखनउ घटना
घटना लखनउको गौतमपल्लीमा रहेको मन्त्रीको सरकारी निवासमा भएको हो। पछि, सर्वोच्च अदालतको हस्तक्षेपपछि एफआईआर दर्ता भयो र आरोपीहरूलाई पक्राउ गरियो।
सर्वोच्च अदालतको आदेशपछि धेरै दबाबमा अखिलेश यादवको सरकारमा खानीमन्त्री रहेका प्रजापतिविरुद्ध २०१७ मा एफआईआर दर्ता भएको थियो। त्यतिबेला उत्तर प्रदेशमा विधानसभा चुनाव चलिरहेको थियो।
प्रजापति र अखिलेश यादव सरकारमाथि पनि खानीमा चलखेल गरेको गम्भीर आरोप छ। अप्रिल २०२१ मा प्रवर्तन निर्देशनालय अर्थात् ईडीले उनको करोडौंको सम्पत्ति जफत गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782563266.png)
-1764146706.png)
