काठमाडौं- पाकिस्तानका प्रधानमन्त्री इमरान खान बुधबार सर्वोच्च अदालतमा हाजिर भएका छन्।
रेडियो पाकिस्तानका अनुसार उनलाई पेशावरको एक विद्यालयमा भएको आक्रमणको अनुसन्धान प्रगतिबारे बुझ्न सर्वोच्चका प्रधानन्यायाधीशले बोलाएका हुन्।
सर्वोच्चमा हाजिर भएका खानलाई उक्त प्रकरणबारे भइरहेको अनुसन्धानको विस्तृत प्रगति प्रतिवेदन चार हप्ताभित्र पेस गर्न आदेश दिइएको छ ।
१६ डिसेम्बर २०१४ मा, तेहरिक तालिबान पाकिस्तानका लडाकुहरूले पेशावरको आर्मी पब्लिक स्कूलमा आक्रमण गरेका थिए। उक्त आक्रमणमा १५० भन्दा बढी व्यक्तिको मृत्यु भएको थियो, जसमध्ये १४४ विद्यालयका विद्यार्थी थिए।
पाकिस्तानका प्रधानन्यायाधीश गुलजार अहमदको अध्यक्षतामा रहेको तीन सदस्यीय इजलासले सर्वोच्चमा आर्मी पब्लिक स्कूलको ‘सुमोटो संज्ञान’मा सुनुवाइ गर्दैछ।
आर्मी पब्लिक स्कूलमा भएको चरमपन्थी हमलाको छानबिन गर्न गठित न्यायिक आयोगले आफ्नो प्रतिवेदनमा घटनालाई ‘सुरक्षाको असफलता’ भनेको छ र यसले पाकिस्तानको सुरक्षा प्रणालीमा प्रश्न चिन्ह्र खडा गरेको बताएको छ।
सर्वोच्चका प्रधानन्यायाधीश अहमदले बुधवार बिहान सुमोटो मुद्दाको सुनुवाइका क्रममा प्रधानमन्त्री खानलाई व्यक्तिगत रूपमा बोलाएका थिए।
सुनुवाइ सुरु भएपछि अदालतले पछिल्लो सुनुवाइमा दिएको आदेश प्रधानमन्त्रीलाई अवगत गराएको हो कि भनेर सोधेको समाचारमा उल्लेख छ। अदालतको आदेश प्रधानमन्त्री खानलाई पठाइएको महान्यायाधिवक्ताले जानकारी दिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
