काठमाडौं– नेपाली कांग्रेसको १४औं महाधिवेशनको कार्यतालिका करिब ९ पटकसम्म संशोधन भइसकेको छ। आगामी मंसिरमा हुने भनिएको महाधिवेशनको मिति पनि ३ पटक फेरिसकेको छ। तेस्रो पटकको संशोधनपछि कांग्रेसले मंसिर २४ देखि २६ सम्म १४औं महाधिवेशन सम्पन्न गर्नेगरी कार्यतालिका 'फाइनल' गरेको छ।
महाधिवेशनको मिति पटक–पटक सर्दै आएकोले यसअघि निर्धारण गरिएको कार्यतालिकाअनुसार नेताहरुले 'दौडधुप'लाई महत्व दिएका थिएनन्। केही नेताहरुले औपचारिक रुपमा उम्मेदवारी घोषणा गरेपनि आम कार्यकर्तामा भने निर्धारित समयमै महाधिवेशन हुनेमा आशंका नै थियो। मंसिरका लागि निर्धारण गरेर तेस्रो पटकको संशोधनपछि 'फाइनल' भएको महाधिवेशनको कार्यतालिकालाई भने नेताहरुले 'गम्भीर' रुपमा लिएका छन्। अब संविधानअनुसार पनि तोकिएकै समयमा महाधिवेशन गर्नैपर्ने बाध्यता रहेकाले कांग्रेसका नेताहरु महाधिवेशन केन्द्रित दौडधुपमा सक्रिय भएका छन्।
महाधिवेशन केन्द्रित छलफल तथा कार्यकर्ता भेटघाटसँगै नेताहरु जिल्ला दौडाहामा समेत लागेका छन्। तिहारअघि विभिन्न जिल्लाको भ्रमणमा निस्किएका शीर्ष तहका नेताहरु छठलगत्तै पुन: जिल्लाका कार्यक्रममा सरिक हुने भएका छन्।
तिहारका २ दिन अघि मधेसका जिल्ला भ्रमण गरी वरिष्ठ नेता रामचन्द्र पौडेल काठमाडौं फर्केका थिए। तिहारअघि धनुषा पुगेका पौडेलले कार्यकर्ता भेटघाटको साथमा पत्रकार सम्मेलन समेत गरेका थिए। सिरहामा कांग्रेसले आयोजना गरेको आमसभामा उनी प्रमुख अतिथि बने। ३ दिने भ्रमणको अन्तिम दिन हेटौंडाका कार्यकर्ता भेटेर पौडेल काठमाडौं फर्केका थिए। अब फेरि जिल्ला जाने नयाँ तालिका १/२ दिनमा बन्ने पौडेलका स्वकीय सचिव चिरञ्जीवी अधिकारीले जानकारी दिए।
संस्थापन समूहबाट सभापतिको उम्मेदवारी घोषणा गरेका उपसभापति विमलेन्द्र निधि छठलगत्तै केही दिन प्रदेश २ का जिल्लामा हुने कार्यक्रमा सरिक हुने भएका छन्। छठलगत्तै प्रदेश २ का जिल्लाका नेता–कार्यकर्ता भेट्ने तालिका बनेको निधिका प्रेस संयोजक रामजी दाहालले जानकारी दिए।
महामन्त्री डा शशांक कोइरालाको भने जिल्ला जाने कुनै कार्यक्रम तत्काल नभएको बताइएको छ। कात्तिक २८ बस्ने केन्द्रीय समिति बैठक र क्षेत्रीय अधिवेशन सकिएपछि उनी जिल्ला जाने तरखरमा छन्।
महामन्त्रीमा उम्मेदवारी दिने बताएका सहमहामन्त्री डा प्रकाशशण महत पूर्वका जिल्लाको भ्रमण सकेर तिहारअघि काठमाडौं फर्केका छन्। ताप्लेजुङ, पाँचथर, इलाम लगायतका जिल्लाका कार्यक्रममा सहभागी भएर महत काठमाडौं फर्किएका थिए।
सभापतिमा उम्मेदवारी दिने घोषणा गरेका नेता प्रकाशमान सिंह पनि महोत्तरी, जनकपुर र चितवनका कार्यकर्ता भेटेर तिहारअघि काठमाडौं फर्केका थिए। सिंहले बाँके र बर्दिया जाने कार्यतालिका तय भइसकेको छ। उनी बुधबार (कात्तिक २४) मा बर्दियाका नेता कार्यकर्तालाई भेट्न त्यसतर्फ जाने भएका छन्। त्यसलगत्तै बाँकेका कार्यक्रममा उनी सरिक हुने भएका छन्।
सिंह लुम्बिनी र कर्णाली प्रदेशका जिल्लाको भ्रमण गरेर फर्कने उनका प्रेस संयोजक युपी लामिछानेले जानकारी दिए। सिंहले विराटनगर र वुटबलका कार्यकर्तासँग दसैं आसपासमा भेट गरेका थिए। सिंह सोमबार सिन्धुली पुगेका छन्। सिंहसँगै आगामी महाधिवेशनमा महाधिवेशनको उम्मेदवारी दिने बताएका नेता गगन थापा पनि सिन्धुली पुगेका छन्।
सभापतिको उम्मेदवारी घोषणा गरेका अर्का नेता डा शेखर कोइरालाले सार्वजनिक कार्यक्रम नगरी कार्यकर्ता भेट्ने कार्यतालिका बनाएका छन्। निश्चित स्थानमा बोलाएर नेता कार्यकर्तालाई भेट्ने उनले कार्यतालिका बनाएका छन्। तिहारअघि २ दिन भैरहवामा रहेर लुम्बिनी प्रदेशका नेता कार्यकर्तालाई कोइरालाले भेटेका थिए। अन्य प्रदेशमा पनि यस्तै प्रकृतिको भेटघाटको कार्यक्रम बनाउने कोइरालाका स्वकीय सचिव दिनेश थपलियाले जानकारी गराए।
पटक पटक महाधिवेशनको मिति सारेको कांग्रेसले मंसिर २४ देखि २६ सम्मको लागि १४ औं महाधिवेशन गर्ने गरी कार्यतालिका बनाएको छ। १२ जिल्लामा आउँदो शनिबार वडा अधिवेशन गर्ने कार्यतालिका बनाइएको छ। ती जिल्लामा विगतमा तोकिएको समयमा वडा अधिवेशन हुन सकेको थिएन। सिन्धुपाल्चोक, डोल्पा, बाँके, कैलाली, सुर्खेत, सप्तरी, सिराहा, धनुषा, महोत्तरी, सर्लाही, बारा र पर्सामा आगामी शनिबार वडा अधिवेशन हुँदैछ।
ती जिल्लामा कात्तिक ३० मा पालिका अधिवेशन हुँदैछ। मंसिर ३ गते प्रदेश सभा क्षेत्रीय अधिवेशन हुनेछ। मंसिर ६ मा एउटा मात्रै प्रतिनिधि सभा निर्वाचन क्षेत्र रहेका १२ जिल्लाको अधिवेशन हुनेछ। एकभन्दा बढी प्रतिनिधि सभा निर्वाचन क्षेत्र रहेका जिल्लाको अधिवेशन मंसिर १० मा सकिने छ।
सोलुखुम्बु, दार्चुला र म्याग्दीको प्रदेश सभा क्षेत्रीय अधिवेशन कात्तिक २७ मा हुने भएको छ। ती ३ जिल्लाको अधिवेशन मंसिर १ मा सम्पन्न गर्ने गरी कार्यतालिका बनेको छ। जुम्लाको जिल्ला अधिवेशन मंसिर १ मा हुने निर्वाचन समितिले जनाएको छ।
अन्य ४६ जिल्लाको प्रदेश सभा निर्वाचन क्षेत्रको अधिवेशन मंसिर ३ मा हुनेछ। ती ४६ जिल्लामध्ये प्रतिनिधि सभाको एक निर्वाचन क्षेत्र भएको जिल्लाको जिल्ला अधिवेशन मंसिर ६ मा सकिनेछ। एकभन्दा बढी निर्वाचन क्षेत्र रहेका जिल्लाको जिल्ला अधिवेशन मंसिर १० मा हुने कार्यतालिका बनेको छ।
सातवटै प्रदेशको प्रादेशिक अधिवेशन मंसिर १६ र १७ मा हुने भएको छ।
रसुवा र रौतहटको क्रियाशील सदस्यता सार्वजनिक हुन नसक्दा दुई जिल्लाको कार्यतालिका बनाइएको छैन। क्रियाशील सदस्यता विवादको समाधान निकाल्न बनाइएको कार्यदलले समाधान निकाल्न नसक्दा सूची प्रकाशित हुन सकेको छैन। रसुवामा समायोजनको विवाद छ भने रौतहटमा नवीकरण सदस्यतामा विवाद रहेको बताइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
