काठमाडौं- अफगानिस्तानको तालिवान सरकारले छिटै नै छात्राहरु पनि विद्यालय जानसक्ने बताएको छ। तालिवानको गृह मन्त्रालयका प्रवक्ता सइद खोस्टीले छात्राहरु विद्यालय फर्किने निश्चित मिति भने शिक्षा मन्त्रालयले तोक्ने बताए।
‘मेरो बुझाइ र सूचनाअनुसार अब निकै कम समयमा सबै युनिभर्सिटी र विद्यालय खुल्नेछन् र महिला तथा बालिका विद्यालय फर्किनेछन्’, उनले भने।
तालिवानले अफगानिस्तानलाई आफ्नो कब्जामा लिएसँगै छात्रहरुलाई भने विद्यालय फर्किने अनुमति दिएको थियो। तर, छात्राहरुलाई विद्यालयमा सुरक्षित वातावरण नबन्दासम्म घरमै बस्न निर्देशन दिएको थियो। यससँगै छात्रालाई विद्यालय जान प्रतिबन्ध लगाएको भन्दै संसारभरबाट विरोध र आलोचना भइरहेको छ।
वर्तमान विश्वमा विद्यालय जान पाउनुपर्ने अधिकारलाई आधारभूत मानवअधिकार मानिएकाले उनीहरुलाई तत्काल विद्यालय फर्किने वातावरण बनाउन विश्वभरीबाट माग हुँदै आएको थियो।
छात्रालाई विद्यालय फर्किने अनुमति नदिएसँगै तालिवानले यसपटक पनि सन् १९९० को दशकको झल्को दिने गरी कट्टरपन्थी शासन चलाउने आशंका बढेको थियो।
तालिवानको यसअघिको शासनकालमा महिला र बालिकालाई कानुनीरुपमा शिक्षा र रोजगारीबाट टाढा राख्ने निर्णय गरेको थियो। गत अगष्टमा तालिवानले अफगानिस्तानलाई आफ्नो कब्जामा लिएसँगै उसले महिला र बालिकाको अधिकारको रक्षा गर्ने बताएको थियो।
यता, विद्यालय तथा विश्वविद्यालयका महिला कर्मचारी तथा शिक्षिकाहरुलाई पनि काम गर्न अनुमति दिइएको छ। केही समय अगाडि अफगानिस्तानका शिक्षिकाहरुले विद्यालय तथा विश्वविद्यालयमा छात्रहरुका लागि पठनपाठन सुरु हुँदा पनि आफूहरुको रोजगारीको निरन्तरता नभएको भन्दै चिन्ता व्यक्त गरेका थिए।
उनीहरुले रोजगारीको निरन्तरता नभएकाले पारिवारिक, आर्थिक तथा मनोवैज्ञानिक समस्यासमेत उत्पन्न भएको बताएका थिए। अधिकारकर्मी तथा उदारवादीहरुले अनुदार नहुन तालिवान समूहलाई अनुरोध गर्दै आएका छन् भने तालिवान अधिकारीहरुले आफूहरु कठोर नहुने जवाफ दिँदै आएका छन्।
यसअघि पाकिस्तानका प्रधानमन्त्री इमरान खानले महिला तथा बालिकालाई शिक्षाबाट वञ्चित गर्नु इस्लामिक नियम नरहेको बताएका छन्। उनले महिलालाई शिक्षा दिने वा नदिने भन्ने विषयसँग धर्मको केही पनि लिनुदिनु नरहेको बताएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1771566457.png)
