काठमाडौं- सच्चा सौदाका प्रमुख बाबा गुरमित रामरहिम सिंहसहित अन्य पाँच जनालाई भारतस्थित पन्चकुलको विशेष अदालतले जन्मकैदको सजाय सुनाएको छ।
रन्जित सिंह हत्याकाण्डमा दोषी ठहरिएका रामरहिमसहित अन्य पाँचलाई सोमबार करिब १९ वर्षपछि जन्मकैदको सजाय सुनाएको हो।
आफूलाई ‘गडफादर’ भनेर चिनाउने बाबा रामरहिमले १९ वर्षअघि अर्थात् सन् २००२ मा आफ्ना म्यानेजर रञ्जित सिंहको हत्या गर्ने षड्यन्त्र रचेका थिए। भारतको अनुसन्धान केन्द्र सिबिआईले रामरहिमलाई फाँसीको सजाय दिन माग गरेको थियो।
यद्यपि, अदालतले सोमबार उनलाई जन्मकैद सुनाउने अन्तिम निर्णय गरेको छ। जन्मकैदको सजायसँगै रामरहिमलाई अदालतले ३१ लाख भारतीय रुपैयाँ जरिवाना सुनाएको छ।
उनले अब ५० प्रतिशत जरिवाना तिर्नुपर्छ। बाँकी दोषीहरुलाई पचास हजार रुपैयाँ जरिवाना गरिएको छ। जरिवानाको आधा रकम पीडित परिवारलाई दिइनेछ।
यसअघि बलात्कारको सजायसमेत भोगका रामरहिमलाई अदालतले हत्यामा संलग्न भएको भन्दै अक्टोबर ८ मा दोषी ठहर गरेको थियो।
रणजीतका छोरा जगसीर सिंहले यो निर्णयप्रति आफू सन्तुष्ट रहेको बताएका छन्। यद्यपि, रामरहिमका वकिल अजय वर्मनले पञ्जाव र हरियाणा उच्च अदालतमा पुनारावेदन दिने बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
