काठमाडौं- कोभिड-१९ महामारीबाट उत्थानशील पुनर्लाभ प्राप्त गर्नका लागि नेपाललाई सघाउने प्रतिबद्धता दोहोर्याउँदै दक्षिण एसियाका लागि विश्व बैंकका उपाध्यक्ष हार्टविग सेफरले आज आफ्नो पाँच दिने नेपाल भ्रमण सम्पन्न गरेका छन्।
प्रधानमन्त्री शेरबहादुर देउवा र अर्थमन्त्री जनार्दन शर्मासँग अलग-अलग भेट गर्दै उपाध्यक्ष सेफरले नेपालको कोभिड-१९ खोपको तीव्र विस्तार तथा आर्थिक पुनरूत्थानमा जोडसहितको कोभिड प्रतिकार्यको सराहना गरे। उक्त बैठकहरूमा उनले सुधार कार्यान्वयन तथा द्रूत लगानी र नेपालको दिगो विकासका लागि उच्च सहकार्यको महत्त्वलाई जोड दिएका थिए।
'२०७२ सालको भूकम्प लगायतका विविध आघातहरूबाट थप सशक्तरूपमा माथि उठेको र कोभिड-१९ महामारीबाट पनि थप सबल पुनर्निर्माणका लागि एउटा स्पष्ट नीतिसहित काम गरिरहेको नेपाल वास्तवमै उत्थानशीलताको एउटा बलियो दृष्टान्त हो,' उपाध्यक्ष सेफरले भने, 'विश्व बैंक नेपालको हरित, उत्थानशील र समावेशी पुनरूत्थानका लागि हामी सरकार, विकास साझेदारहरु, निजी क्षेत्र, नागरिक समाज र अन्य प्रमुख सरोकारवालाहरु मिलेर काम गर्न प्रतिबद्ध छ।'
नेपालको हरित, उत्थानशील र समावेशी विकास (ग्रिड)सम्बन्धी गत असोज ७ गते आयोजना गरिएको उच्चस्तरीय सम्मेलनको अवसरमा जारी गरिएको काठमाडौं घोषणापत्रमा हस्ताक्षर गर्न विश्व बैंक, नेपाल सरकार र विकास साझेदारहरुको साथमा सहभागी भएको थियो। उक्त घोषणापत्रले ग्रिड भिजनप्रतिको नेपाल सरकारको प्रतिबद्धतालाई उजागर गर्दै सम्भावित प्राथमिकता लगानी, बजार प्रोत्साहन र नीति, संस्थागत कार्य लगायतका क्षेत्र तथा ग्रिडतर्फको नेपालको यात्राका लागि आवश्यक सूचनासहित साझेदारहरूको सहयोगलाई एकताबद्ध गरेको छ।
'विकासको एक नयाँ आयामतर्फ लम्केकोमा म नेपालको प्रशंसा गर्न चाहन्छु। त्यो नयाँ आयाम नेपालको हरित, उत्थानशील र समावेशी विकासको खाका अर्थात् ग्रिड हो। ग्रिड अवधारणाले जनता, पृथ्वी र नेपालको अर्थव्यवस्थाका लागि छोटो, मध्यम तथा दीर्घकालीन रूपमा फाइदा प्रदान गर्नेछ,' उपाध्यक्ष सेफरले भने, 'नेपालको दिगो विकासलाई सुदृढीकरण गर्नका लागि काठमाडौं घोषणापत्रमा समर्थन र सहयोग गर्न पाउँदा विश्व बैंक निकै हर्षित छ।'
नेपाल भ्रमणका क्रममा प्रादेशिक मुख्यमन्त्रीहरु र मेयरहरु तथा निजी क्षेत्रका प्रतिनिधिहरुसँगको बैठकहरुमा पनि उपाध्यक्ष सेफर सहभागी भएका थिए। उनले प्रस्तावित माथिल्लो अरूण जलविद्युत् आयोजना निर्माणस्थल तथा प्रदेश १ मा ढल्केबर सबस्टेसनको पनि भ्रमण तथा अवलोकन गरे। विश्व बैंकले प्रस्तावित माथिल्लो अरूण जलविद्युत् आयोजनाको विकासका लागि तथा नेपाल-भारत उच्च भोल्युमको सीमापार विद्युत् व्यापारलाई सहजीकरण गर्न नेपालकै सबैभन्दा ठूलो ढल्केबर सबस्टेसनको लागि सम्भाव्यता अध्ययन कार्यमा सहयोग गरिरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
