राजविराज– प्रमुख निर्वाचन आयुक्त अयोधिप्रसाद यादवको कार्यक्रम उनकै गृहजिल्ला सप्तरीका पत्रकारहरुले बहिस्कार गरेका छन्।
निर्वाचन कार्यालय सप्तरीले सोमबार आयोजना गरेको ‘निर्वाचन कानुन सम्बन्धी सरोकारवालाहरुसँगको अन्तरक्रिया कार्यक्रम’मा सरोकारवाला पक्ष र निकायलाई सहभागी नगराई औचित्यहीन कार्यक्रम गरेको भन्दै पत्रकारहरु कार्यक्रमस्थलबाट बाहिरिएका हुन्।
तीनै चरणका निर्वाचन शान्तिपूर्ण, निष्पक्ष र भयरहित वातावरणमा सम्पन्न गराउन महत्वपूर्ण भूमिका निर्वाह गरेका सञ्चारकर्मी, प्रमुख दलका नेता तथा कानुन व्यवसायीलाई कार्यक्रममा सहभागी नगराइएको भन्दै पत्रकारहरुले आयुक्तको ध्यानाकर्षण गराएका थिए।
नेपाल कम्युनिष्ट पार्टी (ने क पा), नेपाली कांग्रेस लगायतका प्रमुख दलका प्रतिनिधि, अधिकारकर्मी, पत्रकार, जिल्ला बार तथा उच्च अदालत बारका प्रतिनिधि समेतलाई कार्यक्रममा सहभागि नगराइएको पत्रकार तथा अधिकारकर्मी मनोहर पोखरेलले बताए। ‘निर्वाचन कार्यालयमा दर्ता नरहेका र अर्को पार्टीमा समाहित भइसकेका राजनीतिक दललाई मात्र कार्यक्रममा बोलाइएको पाइयो,’ पोखरेलले भने, ‘महत्वपूर्ण कार्यक्रममा महत्वपूर्ण र सरोकारवाला पक्ष नै सहभागी नरहेपछि त्यस्तो कार्यक्रमको औचित्य देखिएन।’
पत्रकारहरुले उठाएको विषयलाई निर्वाचन कार्यालयसहित प्रमुख आयुक्त समेतले गम्भीरतापूर्वक नलिएपछि कार्यक्रम बहिस्कार गर्नुपरेको पत्रकार हेमशंकर सिंहले बताए। ‘मुलुकलाई अपडेट गराउने निर्वाचन कार्यालय आफै अपडेट भएन,’ उनले थपे, ‘तीन वर्षअघि बनाएको लिस्ट अनुसार कार्यक्रममा सहभागी बोलाइएको पाइयो, अहिलेको अवस्थामा त्यो सहभागिताले खासै अर्थ राख्दैन।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
