बेनी, म्याग्दी- पैदल तथा हवाईमार्ग हुँदै अवैध रुपमा अमेरिका हिँडेका म्याग्दीका १३ जना युवा नाइजेरियाको लागोसमा अलपत्र परेका छन्।
दलाललाई मोटो रकम बुझाएर भारत, थाइल्यान्ड हुँदै नाइजेरिया पुगेका म्याग्दीका १३ सहित २३ नेपाली युवालाई लागोसको एक होटलमा बन्धक बनाइएपछि घटना खुलेको हो। नाइजेरियन दलालसँगै रहेका नेपाली दलालले समेत होटलबाट बाहिर आउन नदिएको म्याग्दी मंगला गाउँपालिका–५ अर्मनका एक युवाले बताए।
करिब २२ महिनाअगाडि हवाई र पैदल यात्रा गरी नाइजेरिया पुगेका युवाले घरपरिवारमा सम्पर्क गरेपछि घटना सार्वजनिक भएको हो। बन्धक बनाइएका युवामध्ये भागेर बाहिर आएकाले दिएको सम्पर्क नम्बरमा जेम्स भन्ने नाम गरेका व्यक्तिले फोन उठाएर कुनै समस्या नभएको बताउने गरेको आफन्तको भनाइ छ।
बन्धक बनाइएका युवा नाइजेरियाबाट अमेरिकातर्फ प्रस्थान गर्ने भएकाले पनि आफ्नो नामसहित पासपोर्टको विवरणसमेत सार्वजनिक नगर्न अनुरोध गरेका छन्। म्याग्दीबाट गएकामा अर्मनका युवा धेरै छन्। बेनी नगरपालिका र गाउँपालिकाका विभिन्न वडाका युवाको नाम पहिचान हुन सकेको छैन। अवैध मार्गबाट करिब रु ३५ लाख खर्च गरी अमेरिका पुग्ने युवालाई नेपाल, भारत लगायत देशका तस्करले तोकेको ठाउँमा मोटो रकम बुझाउनुपर्छ। सम्झौताअनुसार रकम बुझाउन नसक्नेलाई होटलमै बन्धक बनाएर राख्ने गरिएको छ।
नेपालबाट पठाउने एजेन्टलाई प्रहरीले पक्राउ गरेको छ। नेपाली एजेन्टलाई पक्राउ गरेपछि थप जानकारी लिने प्रयास भइरहेको परिवार स्रोतलाई उद्धृत गर्दै अमेरिकामा रहेका एक म्याग्देलीले जानकारी दिए। उनले आफू पनि हिँडेर आएको बताउँदै बाटो जोखिमपूर्ण भए पनि नेपालीको आकर्षण नघटेको बताए।
पछिल्लो समय, बोलिभिया, पानामा र मेक्सिकोमा समेत नेपाली दलालले होटल लगायतमा काम गर्ने गरी त्यहाँ पुगेर सेटिङ मिलाउने गरेका छन्।
बन्धक बनाइएका युवाले विभिन्न अन्तर्राष्ट्रियस्तरका रेमिट कम्पनीमार्फत परिवारबाट रकम मगाइरहेका छन्। भारत, ब्राजिल, इथोपिया, बोलिभिया, पेरू, इक्वेडर, पानामा हुँदै करिब १२ देशका समुद्र र जंगलको कठोर यात्रा पार गरी मेक्सिकोमा पुगेपछि तस्करले अन्तिम सेटिङ गरेबापत रकम माग्ने गर्छन्। हरेक वर्ष म्याग्दीबाट रु ५० लाखसम्म दलाललाई बुझाएर अमेरिका जाने युवाको संख्या अत्यधिक रहेको छ।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
