काठमाडौं– सेसे उर्फ उर्पा तामाङ। नुवाकोटको बिदुर नगरपालिका–१३ का ५२ वर्षीय सेसे अहिले लागु औषध नियन्त्रण ब्यूरोको हिरासत कक्षमा छन्।
चरेस प्याकिङ गर्ने र विदेश सप्लाई गर्ने गिरोहका नाइके सेसे रहेको खुलेपछि ब्यूरोले उनलाई सामाखुसीबाट नियन्त्रणमा लिएको छ। सेसेको गिरोहले लामो समयदेखि लागु औषध चरेस विदेश सप्लाई गर्दै आएको खुलेको छ।
२५ वर्षअघिको जस्तै अहिले पनि उनी लागु औषधको धन्दामा सक्रिय रहेका पाइएको प्रहरीले जानकारी दिएको छ। १९ वर्ष जेल बसेर छुटेका उनी पुन: पुरानै धन्दामा लागेका पाइएको छ।
००००
म्याग्दीको मंगला गाउँपालिका–३ का ३६ वर्षीय श्याम प्रसाद रोका भदौ २१ गते बिहान कतारको दोहा जानका लागि त्रिभुवन अन्तर्राष्ट्रिय विमानस्थल पुगेका थिए। दोहाका लागि कतार एयरवेजको विमानले बिहान ११:५ बजे उडान भर्दै थियो।
विमानतर्फ प्रस्थान गर्नु अगाडि उनको लगेज एक्सरे मेसिनमा पठाइयो। तर, उनको लगेजमा ओसारपसार गर्न प्रतिबन्ध गरिएको समान रहेको संकेत देखियो।
एक्सरे मेसिनको संकेतपछि प्रहरीले उनको लगेज खोलेर हेर्दा ४ किलो ३५ ग्राम चरेस भेटियो। लगेजबाट चरेस बरामद भएपछि विमानस्थल सुरक्षार्थ तैनाथ प्रहरीले रोकालाई पक्राउ गरी सोधपुछ सुरु गर्यो।
श्याम प्रसादले प्रहरीलाई दिएको बयानकै आधारमा विमानस्थलको प्रस्थान कक्षबाटै ३५ वर्षीय वीरबहादुर रोका पनि पक्राउ परे। वीरबहादुरको लगेज खोतल्दा प्रहरीले ४ किलो ३५ ग्राम चरेस बरामद गर्यो।
विमानस्थलबाटै चरेस कतार लैजान लागिएको पाइएपछि लागु नियन्त्रण ब्यूरोको टोलीले ‘अपरेशन ह्यास’ नाम दिएर यसको अनुसन्धान सुरु गरेको थियो। अनुसन्धानको क्रममा म्याग्दी मंगला गाउँपालिका–३ का ४४ वर्षीय दिल बहादुर रोका, धादिङ जिल्ला गंगा जमुना गाउँपालिका–४ का ३३ वर्षीय अनिल बहादुर घले, सोही स्थानका २८ वर्षीय सुन बहादुर गुरुङ, धादिङ खनियाबास गाउँपालिका–५ का २८ वर्षीय याङ्की भनिने जित बहादुर तामाङ र सोही ठेगानाका ३६ वर्षीय माइला भन्ने कृष्ण बहादुर तामाङ समेत पक्राउ परे।
दिलबहादुर, अनिलबहादुर र सुनिलबहादुर विदेश जाने मान्छे खोज्ने व्यक्ति रहेका पाइएको छ।
उनीहरुलाई याङ्की भन्ने जितबहादुरले कतार जाने मान्छे खोज्न लगाएका थिए। याङ्कीलाई पनि मान्छे खोज्ने जिम्मा कृष्णबहादुरले दिएका थिए। याङ्की र कृष्णबहादुरलाई विदेश चरेस सप्लाई गर्न मान्छे चाहिएको बारे थाहा भएपनि दिलबहादुर, अनिलबहादुर र सुनिलबहादुरलाई भने थाहा नभएको पाइएको ब्यूरोका एसएसपी हृदय थापा बताउँछन्।
कृष्णबहादुर विदेश चरेस पठाउनेका योजनाकारमध्ये एक थिए भने याङ्की मान्छे खोजेर नाफा खाने हिस्सेदार।
उनीहरु पक्राउ परेसँगै चरेस विदेश सप्लाई गर्ने धन्दामा जोडिए सेसे। सेसेको टोखास्थित कोठा खानतलासी गर्दा चरेस प्याकिङ कारखाना नै सञ्चालन गरेर धन्दा चलाउने गरेको पाइएको एसएसपी थापा बताउँछन्। सेसेको कोठाबाट ऊनका ह्याण्डी क्राफ्ट २३ थान, डायरी १६ थानमा फल्स बटम बनाएर विदेश पठाउन भनेर तयारी अवस्थामा राखिएको ३ किलो ५७९ ग्राम चरेस प्रहरीले बरामद गरेको थियो।
योसँगै लागु औषध चरेससहित प्याकिङका लागि प्रयोग हुने विभिन्न औजार पनि बरामद गरिएको प्रहरीले जानकारी दिएको छ। चरेसको पाता बनाउनको लागी प्रयोग गरिने औजारहरु, लुकाउन प्रयोग गरिने कार्टुन, गम, र्यापिङ टेप तथा ह्याण्ड क्राफ्ट लगायतका सामानहरु बरामद भएका प्रहरीको भनाइ छ।
यसरी कारखाना नै सञ्चालन गरेर लागु औषधको धन्दा सञ्चालन गर्दै आएका मुख्य योजानकार सेसे १९ वर्ष जेल बसेर पुन: यही धन्दामा संलग्न रेहका पाइएको हो।
सेसेलाई २०५४ कात्तिक ७ गते काठमाडौं प्रहरीले बौद्ध महांकालबाट ८५० ग्राम खैरो हिरोइनसहित पक्राउ गरेको थियो। उक्त प्रकरणमा उनलाई १५ वर्ष कैद र ५ लाख जरिवाना सुनाइएको थियो।
१५ वर्ष कैद भुक्तान गरे पनि जरिवाना वापतको ५ लाख रुपैयाँ नतिरेपछि उनी १९ वर्ष जेल बसेर २०७३ सालमा रिहा भएका थिए। त्यसयता उनले फेरि पहिलाकै जस्तो धन्दा सुरु गरेको पाइएको ब्यूरोका एसपी तथा प्रवक्ता जीवन श्रेष्ठले बताए।
उनी लागु औषध कारोबार गर्नकै लागि २ पटक थाइल्याण्ड र १ पटक चीन समेत पुगेका खुलेको छ। थाइल्याण्डबाट हङकङ जान समेत उनले प्रयास गरे पनि भिसा नलागेकाले सफल भएनन्। यसरी थाइल्याण्ड र चीन समेत पुगेर ग्राहक खोज्ने र चरेस सप्लाई गर्ने काममा सेसे २०७३ सालदेखि निरन्तर लागेको एसपी श्रेष्ठ बताउँछन्।
सेसे र वीरबहादुर मिलेर यसरी धन्दा चलाउँदै आएको पाइएको छ। उनीहरुले विभिन्न ह्याण्डी क्राफ्ट र गिफ्टका सामानहरुमा चरेस प्याक गर्ने र ह्याण्डी क्राफ्टका सामान भन्दै स्थलमार्गबाट भारतको कलकत्तासम्म पुर्याउने र त्यहाँबाट पानी जहाजमार्फत हङकङ, चीन, थाइल्याण्ड, टर्कीसम्म चरेस सप्लाई गर्ने गरेको खुलेको श्रेष्ठले दाबी गरे।
स्थलमार्गसँगै उनीहरुले हवाईमार्गबाट पनि आफ्नो धन्दा बिस्तार गर्ने योजना बनाएका थिए। सोही योजनाअनुसार विदेश जाने मान्छे खोज्ने र उनीहरुलाई हवाई टिकट काटिदिनेदेखि, सपिङ गर्ने र विभिन्न किसिमका सहयोग गरेर प्रलोभनमा पारी विश्वास दिलाइएर गिफ्टका सामानहरु भन्दै चरेस पठाउने गरेको खुलेको एसपी श्रेष्ठ बताउँछन्।
योसँगै सेसेले विदेश जानेहरुका लागि चाहिने विभिन्न अनुभव तथा तालिम सम्बन्धीका नक्कली सर्टिफिकेट समेत बनाउने गरेको खुलेको छ। १० हजार रुपैयाँ लिँदै उनले विभिन्न व्यक्तिलाई नक्कली सर्टिफिकेट बेच्ने गरेको प्रहरीले जनाएको छ। उनको साथबाट केही नक्कली सर्टिफिकेटहरु समेत बरामद भएको ब्यूरोले जानकारी दिएको छ।
उनीहरुविरुद्ध लागु औषध नियन्त्रण ऐन २०३३ अन्तर्गत मुद्दा दर्ता गरी म्याद लिए अनुसन्धान सुरु भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779255893.png)
