तालिबानले अपनाउन थालेको अतिवादी नीतिका विरुद्ध अफगानिस्तानका महिलाले सामाजिक सञ्जालबाट प्रतिवाद थालेका छन्। तालिबानले छात्राहरुका लागि लागू गरेको कठोर पोसाकसंहिताको विरोधमा महिलाहरुले परम्परागत रंगीचंगी पोसाक लगाएका तस्बिर सामाजिक सञ्जालमा राख्न थालेका छन्।
उनीहरुको अभियानलाई विश्वभर रहेका अफगान महिलाले समर्थन गर्दै परम्परागत रंगीचंगी पोसाक लगाएका तस्बिर पोष्ट गर्न थालेका छन्। उनीहरुले #DoNotTouchMyClothes अर्थात् ‘मेरो पोसाक नछोऊ’ ह्यासट्याग प्रयोग गरिरहेका छन्।
यो विरोध तालिबानहरुले काबुल विश्वविद्यालयमा गरेको प्रदर्शनको प्रतिक्रिया हो, जहाँ करिब ३०० महिला अनुहार, हात र खुट्टासमेत छोपिने कालो पोसाकमा थिए। त्यस्तो पोसाक यसअघि कहिल्यै देखिएको थिएन। ती महिलाले तालिबानको झन्डा फहराएका थिए र सरकारका उच्च पदमा महिला नराख्ने तालिबानको नीतिको समर्थन गरेको बताएका थिए। उनीहरुले विद्यालय तथा विश्वविद्यालयहरुमा पनि लैङ्गिक पृथकता अपनाउनुपर्ने बताएका थिए।
केही दनअघि अफगानी महिलाले अधिकारको माग गर्दै देशका प्रमुख शहरहरुमा भौतिक रुपमा नै प्रदर्शन गरेका थिए। प्रदर्शनलाई अवरोध गर्न खोज्ने र पत्रकारलाई बन्दुक देखाउँदै नियन्त्रणमा लिने चार जनालाई पक्राउ गरेको तालिबानले जनाएको थियो। तालिबानले सबैभन्दा पछि आफ्नो नियन्त्रणमा लिएको पन्जशिर उपत्यकामा प्रदर्शनका क्रममा डरलाग्दो भिडन्त नै भएको थियो।
घोर प्रान्तकी एक महिला प्रहरी अधिकृतलाई उनको घरैमा गाली हानी हत्या गरिएपछि त्यहाँका महिला त्रसित बनेका छन्। ती प्रहरी अधिकृतलाई उनका आफन्तकै अघि हत्या गरिएको थियो र आफन्तले तालिबानहरुमाथि हत्याको आरोप लगाएका छन्।
धेरै अफगानी महिला, विशेषगरी शहरमा बस्नेहरु तालिबानले महिलामाथि लगाउने कठोर प्रतिबन्धबाट डराएका छन्। उनीहरु फेरि सन् १९९६ देखि २००१ सम्म तालिबानको शासनकालमा जस्तै घरभित्रै बस्नुपर्ने त्रासमा छन्। त्यति बेला महिलाले घरबाहिर गएर काम गर्न पाउँदैन थिए। बाहिर निस्कन साथमा अनिवार्य परिवारका सदस्य वा श्रीमान् हुनुपर्ने नियम थियो।
-अलजजिराबाट
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
