काठमाडौं– २०७४ सालमा दशैंको अवसरमा कैद सजाय माफी पाएर जेलबाट रिहा हुने ४५६ जना बन्दीमध्ये एक थिए, पर्साको वीरगञ्ज महानगरपालिका– २४ का ३३ वर्षीय विवेक सिंह भनिने फुलहसन अन्सारी। वीरगञ्जका युवा व्यवसायी राजेश क्यालको हत्या अभियोगमा दोषी ठहर गर्दै उनलाई तीनै तहका (जिल्ला, उच्च र सर्वोच्च) अदालतबाट सर्वश्वसहित जन्म कैदको सजाय तोकिएको थियो।
तर, ४५ प्रतिशत पनि कैद सजाय भुक्तान नगरी 'असल चालचलन' देखिएको भन्दै मन्त्रिपरिषद्को सिफारिसमा राष्ट्रपति विद्यादेवी भण्डारीले १३ असोज २०७४ मा उनको बाँकी कैद मिनाहा गरिदिइन्।
०००
२०६५ पुस ७ गते वीरगञ्ज–१३, आदर्शनगरका ३० वर्षीय राजेश क्यालको गोली हानी हत्या भएको थियो। प्रहरी अनुसन्धानको क्रममा क्यालको हत्यामा विवेक सिंह भनिने फुलहसन अन्सारीको संलग्नता रहेको खुलेको थियो।
जिल्ला प्रहरी कार्यालय पर्साको विशेष टोलीले हत्याको एक हप्तापछि पुस १६ गते हत्यामा प्रयोग गरिएको पेस्तोलसहित फुलहसनलाई पक्राउ गरेको थियो। जिल्ला अदालत पर्साबाट उच्च अदालत हुँदै सर्वोच्चसम्मले फुलहसनलाई उक्त घटनामा दोषी ठहर गरेको थियो। कर्तव्य ज्यान मुद्दामा उनीविरुद्ध सर्वश्वसहित जन्मकैदको सजाय सुनाइएको थियो।
क्यालको गोली हानी हत्या गरिएको पुष्टि भएपछि जेल जीवन बिताइरहेका फुलहसन राजनीतिक पहुँचको आधारमा ५६ प्रतिशत कैद भुक्तान गर्न बाँकी हुँदै रिहा भए। दसैंको अवसरमा सरकारको सिफारिसमा राष्ट्रपतिले २०७४ असोज १३ गते उनको बाँकी कैद मिनाहा गरेकी थिइन्। राष्ट्रपतिले माफी दिँदा उनले ५६ प्रतिशत कैद भुक्तान गर्न बाँकी नै थियो।
'असल चालचलन' भइ कैद सजाय मिनाहा पाएका उनै फुलहसन ३ वर्ष अगाडि वीरगञ्जमा भएको 'बम काण्ड'मा पक्राउ परेका छन्।
२०७६ साउन २४ गते साँझ ७ बजेतिर वीरगञ्जको बिर्ता बजार र त्यसको ४ दिनपछि राति सवा ८ बजेतिर घण्टाघर नजिकको तरकारी बजारमा सुतली बम राखिएको थियो। बम राखेर त्रास फैलाउने र व्यवसायीबाट रकम उठाउने योजनाका साथ बम राखिएको थियो।
पर्साका तत्कालीन एसपी सामेन्द्रसिंह राठौरको टोलीले उक्त बम काण्डमा संलग्न भएको आरोपमा पर्साको वीरगञ्ज महानगरपालिका–२४ रामगढवा बस्ने ३२ वर्षीय इनुस अन्सारी, सोही ठाउँका २२ वर्षीय सद्दाम अन्सारी र १९ वर्षीय टाइगर भनिने जौवाद अन्सारीलाई पक्राउ गरेको थियो ।
उनीहरुलाई ४ थान गोली र बिस्फोटक पदार्थसहित जिल्ला प्रहरी कार्यालय पर्साको विशेष टोलीले २०७५ भदौ ४ गते वीरगञ्जको चण्डाल चोकबाट पक्राउ गरेको थियो। पक्राउ परेकाहरुको बयानबाट खुल्यो– घटनाका मुख्य योजनाकार त 'असल चालचलन' भइ कैद सजाय मिनाहा पाएका उनै फुलहसन रहेछन्।
पक्राउ परेका ३ जना र फरार रहेका फुलहसन समेत गरी ४ जनाविरुद्ध प्रहरीले विष्फोटक पदार्थ, हातहतियार खरखजाना तथा संगठित अपराधको कसूरमा मुद्दा चलाउन सिफारिस गरेको थियो। प्रहरीको सिफारिसअनुसार नै जिल्ला सरकारी वकिल कार्यालय पर्साले ४ जनाविरुद्ध जिल्ला अदालत पर्सामा मुद्दा दर्ता गर्यो।
जिल्ला अदालतले पक्राउ परेका ३ जनाको हकमा २ वर्ष ६ महिना कैद र २५ हजार रुपैयाँ जरिवानाको सजाय सुनाएको थियो। फरार फुलहसनको मुद्दा भने मुल्तबीमा थियो।
घटना भएको मितिदेखि फरार रहेका फुलहसनलाई प्रहरीले ३ वर्षपछि पक्राउ गरेको छ। लामो समयदेखि भारतमा रहेका उनलाई पर्साको रामगढवास्थित घर आउने क्रममा पक्राउ गरिएको जिल्ला प्रहरी कार्यालय पर्साका प्रमुख, एसपी वेलबहादुर पाण्डेले नेपाल लाइभलाई बताए। भारतबाट आफ्नो घर पर्साको रामगढवा आउने क्रममा उनलाई सामेबार बिहान ४ बजे पक्राउ गरिएको पाण्डेले बताए। अब उनको मुद्दा अघि बढाइने एसपी पाण्डेको भनाइ छ।
बम राख्दै सीडीओलाई पठाउँथे धम्कीपूर्ण म्यासेज
प्रहरीको अनुसन्धानबाट खुलेअनुसार फुलहसनले विभिन्न ठाउँमा बम राखेर प्रमुख जिल्ला अधिकारी (सीडीओ)लाई नै धम्कीपूर्ण सन्देश (म्यासेज) पठाउँने गरेका थिए।
प्रहरीका अनुसार फुलहसनसहित उनको समूहका व्यक्तिले वीरगञ्ज कारागारका चौकीदार शेख भोलासँग १० लाख रुपैयाँ मागेका थिए। १० लाख रुपैयाँ नदिए पर्साका सीडीओलाई भनेर सरुवा गरिदिने धम्की पनि उनीहरुले दिएका थिए।
त्यसपछि फुलहसनसहित उनको समूहका व्यक्तिले पर्साका तत्कालीन प्रमुख जिल्ला अधिकारीलाई मोबाइलमा धम्कीपूर्ण म्यासेज पठाएका थिए। सीडीओ समेतलाई आतंकित पार्न उनीहरुले २०७६ साउन २४ र २८ गते वीरगञ्जका विभिन्न ठाउँमा बम विस्फोट गराएका थिए। विस्फोटमा परेर केही मानिस घाइतेसमेत भएका थिए।
त्यतिबेला पक्राउ परेकाहरुबाट प्रहरीले ४ राउण्ड गोली, सुतली बमजस्तो देखिने वस्तु ३ थान र मोबाइल बरामद गरेको थियो।
भेष बदलेर भारतमा बस्दै नेपालमा फिरौतीको धन्दा
बम विस्फोटको घटनामा प्रहरीले अभियुक्तको सूचीमा राखेपछि फुलहसन भारत भागेका थिए। त्यसपछि भारतमै बसेर उनले नेपालमा फिरौतीको धन्दा चलाएको पर्साका एसपी पाण्डे बताउँछन्।
पाण्डेका अनुसार उनी भेष बदलेर भारतको मुजफ्फपुरमा बस्दै आएका थिए। नेपालमा विवेक र फुलहसन नामबाट चिनिदै आएका उनी भारतमा भने अंकित पटेलको नाममा बस्दै आएका थिए। अंकित पटेलकै नामबाट उनले भारतमा आधार कार्डसमेत बनाएका खुलेको छ।
यसबीचमा उनी धेरै पटक नेपाल आउजाउ गरेको पनि देखिएको छ। भारतमा बसेर नेपाली व्यापारीलाई धम्क्याउने उनले नेपालमै आएर फिरौती उठाउने गरेका थिए। एसपी पाण्डेका अनुसार पछिल्लो समय केही व्यापारीले फिरौती दिन नमानेपछि उनले 'नेपालमै आएर घटना घटाउने' भनेर धम्की दिने गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
