काठमाडौं- वैदेशिक रोजगार पत्रकार समाजको अध्यक्षमा उद्धवराज भट्टराई चयन भएका छन्। समाजको आज सम्पन्न १२औं साधारणसभाले आगामी दुई वर्षका लागि भट्टराईको अध्यक्षतामा सर्वसम्मतले नयाँ कार्यसमिति चयन गरेको हो।
नयाँ कार्यसमितिको वरिष्ठ उपाध्यक्षमा इन्द्रलक्ष्मी घिमिरे, उपाध्यक्षमा रेशमराज पौडेल, महासचिवमा केशव भूल, सचिवमा निर्मला घिमिरे, कोषाध्यक्षमा मनुका कुँवर तथा सदस्यहरुमा अरिश्मा मोक्तान, अमिर लामा, प्रविन राउत र सुरेन्द्र बजगाई चयन भएका छन्। सल्लाहकारहरुमा मदन कुमार श्रेष्ठ, रुद्र खडका, मधुजंग पाण्डे, रामजी बगाले र घनश्याम आचार्य चयन भएका छन्।
साधारणसभाकै अवसरमा समाजद्वारा प्रकाशित स्मारिका ‘श्रम तथा आप्रवासन’समेत सार्वजनिक गरिएको थियो।
साधारणसभाको उद्घाटन सत्रमा बोल्दै श्रम मन्त्रालयका सचिव सूर्यप्रसाद गौतमले कोभिडले आर्थिक गतिविधि ठप्प बनाउँदासमेत रेमिट्यान्सकै कारण अर्थतन्त्र चलायमान बनेको भन्दै लागि वैदेशिक रोजगार व्यवसायको क्षेत्रले पुर्याएको योगदान महत्त्वपूर्ण रहेको बताएका थिए। उनले वैदेशिक रोजगारको क्षेत्रलाई सम्मानित, मर्यादित तथा प्रतिष्ठित बनाउन सरकार, निजी क्षेत्र तथा सरोकारवाला निकाय सबैले आफ्नो ठाउँबाट भूमिका खेल्नुपर्ने बताउँदै सञ्चारमाध्यमलाई पनि नकारात्मकभन्दा सकारात्मक ढंगबाट विषय उठान गर्न आग्रह गरे।
राष्ट्रिय मानवअधिकार आयोगका अध्यक्ष तपबहादुर मगरले रेमिट्यान्सले मुलुकको अर्थतन्त्र धानिरहेको यथार्थकाबीच अधिकांश नेपाली रहरले नभइ बाध्यताले वैदेशिक रोजगारीमा जानुपरेको र अब ती नेपालीको सुरक्षाबारे सबै पक्षको ध्यान जान जरुरी रहेको बताए। उनले श्रम गन्तव्य मुलुकको अवस्था र सुरक्षित रोजगारीको बारेमा वैदेशिक रोजगारीमा जाने कामदारलाई सुसूचित गराउन सके धेरै समस्या हल हुने भन्दै यो भूमिका खेलिदिनका लागि सञ्चारकर्मीहरुलाई आग्रह गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
