विराटनगर– संघीय संरचनामा प्रदेश १ को अस्थाई राजधानी विराटनगर तोकिएपछि भौतिक पूर्वाधार व्यवस्थापनको विषय जोडतोडले चलिरहेको छ। यसका साथै विमानस्थल स्तरोन्नतिको विषय पनि निकै चर्चामा छ।
विराटनगर विमानस्थलाई स्तरोन्नति गरी अन्तर्राष्ट्रिय विमानस्थलको रुपमा विकास गर्न प्रदेश मन्त्री, सांसद तथा महानगरपालिकाका प्रमुख समेत लागिपरेका छन्।
त्रिभुवन विनमास्थलले मात्रै अन्तर्राष्ट्रिय उडान धान्न नसक्ने भएकाले त्यसको विकल्पका रुपमा विराटनगर विमानस्थलाई उपयोग गर्न उनीहरुले नागरिक उड्डयन प्राधिकरणलाई प्रस्ताव गरेका छन्। त्रिभुवन अन्तर्राष्ट्रिय विमानस्थलको एयर ट्राफिक समस्याको समाधानका लागि आसपासका विमानस्थललाई विकल्पका रुपमा प्रयोग गर्नुपर्ने र त्यसका लागि विराटनगर विमानस्थल उपयुक्त हुने उनीहरुको प्रस्ताव छ।
केही दिनअघि विराटनगर आएका संस्कृति, पर्यटन तथा नागरिक उड्डयनमन्त्री रविन्द्र अधिकारीलाई पनि यस विषयमा पहल गर्न आग्रह गरिएको महानगरपालिकाका मेयर भीम पराजुलीले बताए। प्रदेश १ का सामाजिक विकासमन्त्री जीवन घिमिरे, सांसद भानुभक्त ढकाल, उद्योग संगठन मोरङका अध्यक्ष मुकेश उपाध्यायलगायतले विमानस्थल स्तरोन्नतिका लागि मन्त्री अधिकारीको ध्यानाकर्षण गराएका थिए।
उनीहरुका अनुसार विराटनगर विमानस्थलले दुई वर्षअघि नै अन्तर्राष्ट्रिय मापदण्ड पूरा गरिसकेको छ। हाल भइरहेको १ हजार ५ सय मिटर लम्बाई र ३० मिटर चौडाइको विमानस्थललाई २ हजार ४ सय मिटर लम्बाई र ४५ मिटर चौडाइको क्षेत्रफलमा विस्तार गर्ने प्रक्रिया अघि बढिसकेको छ।
मन्त्री अधिकारीले पनि विराटनगर विमानस्थलबाट अन्तर्राष्ट्रिय उडान गर्न सक्ने गरी विस्तार गर्न सरकार लागिपरेको बताएका थिए। उनले अन्तर्राष्ट्रियस्तरको बनाउन जग्गा अधिग्रहण गरी असार १ बाट मुआब्जा वितरण गर्न नागरिक उड्डयन प्राधिकरणलाई निर्देशन समेत दिएको जनाएका थिए।
नागरिक उड्डयन प्राधिकरणका महानिर्देशक सञ्जीव गौतमले पनि ७८ हेक्टर क्षेत्रफल रहेको विराटनगर विमानस्थललाई १ सय ५० हेक्टरमा विस्तार गर्ने योजना रहेको बताए। विमानस्थल पूर्व ठूलाठूला घर र पश्चिमतर्फ सानो बस्ती रहेकाले त्यसको व्यवस्थापनका लागि पनि प्राधिकरणले आवश्यक प्रक्रिया अघि बढाइसकेको उनको भनाइ थियो।
विमानस्थल आसपासको साढे ४ बिगाह जमिनको मुआब्जा वितरणका लागि सरकारले ६९ करोड रकम छुट्याएको पनि उनले जानकारी दिए।
केही वर्षअघिसम्म विराटनगर विमानस्थलबाट सोलु, खोटाङ, ताप्जेलुङ, ओखलढुंगा, भोजपुर, संखुवासभाका ८ विमानस्थलमा सिधा उडान हुँदै आएको थियो। तर, हाल तुम्लिङटार विमानस्थलमा मात्रै उडान हुँदै आएको छ। प्राधिकरणका आनुसार हाल प्रदेश १ मा १३ वटा विमानस्थल सञ्चालनमा छन् भने २ वटा निर्माणाधीन अवस्थामा छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_Tr387xuecJ-1778130428.jpg)
-1764146706.png)
