काठमाडौं– संखुवासभाको मादी नगरपालिका–१ मा एकै परिवारका ६ जनाको हत्याबारे अनुसन्धान गर्न केन्द्रीय अनुसन्धान ब्यूरो (सीआइबी) को टोली घटनास्थलतर्फ प्रस्थान गरेको छ।
सीआइबीका निर्देशक तथा डीआइजी धिरजप्रताप सिंहका अनुसार डीएसपीको कमाण्डमा तीन जनाको टोली मंगलबार संखुवासभा पठाइएको हो। सीआइबीको जघन्य अपराध हेर्ने पिलरका प्रमुख प्रहरी नायव उपरीक्षक (डीएसपी) रुगम कुँवरको नेतृत्वको तीन सदस्यीय टोली मंगलबार संखुवासभा पठाइएको हो।
‘घटना निकै गम्भीर र जघन्य प्रकृतिको देखिएपछि अनुसन्धानमा सहयोगका लागि टोली पठाएका छौं। स्थानीय प्रहरीलाई हाम्रो टोलीले सहयोग गर्नेछ’ डीआइजी सिंहले नेपाल लाइभसँग भने।
देशभरका जघन्य र ठूला प्रकृतिको अपराधको अनुसन्धान गर्ने जिम्मा पाएको सीआइबीले संखुवासभाको घटना बाहिरिए लगत्तै प्राविधिक पाटोबाट स्थानीय प्रहरीलाई सघाइरहेको थियो। घटनाको अहिलेसम्म निचोड ननिस्किएपछि टोलीनै घटनास्थल पठाइएको छ।
सीआइबीको टोलीले घटनास्थल वरपर चालू अवस्थामा रहेका मोबाइलको लोकेशन केलाउनेदेखि, विभिन्न अन्य प्राविधिक पाटाको अनुसन्धान गर्नेछ।
सोमबार बिहान पौन १० बजेतिर स्थानीय लास देखेपछि प्रहरीलाई खबर गरेका थिए। प्रहरी पुगेर हेर्दा १ वटा लास घरमा, एउटा सडकमा, २ वटा बारीको कान्लामा र २ वटा खोल्सामा भेटिएको थियो। मृत फेला पर्नेहरुमा ८४ वर्षीया पार्वती कार्की, उनका ५२ वर्षीय छोरा तेज बहादुर कार्की, तेजबहादुरकी श्रीमती कमला कार्की, बुहारी ३२ वर्षीया रञ्जना कार्की, ११ वर्षीय दिपेन कार्की र ७ वर्षीया गोमा कार्की रहेका छन्।
उक्त घटनामा ९० वर्षीय बौद्धमान कार्की भने सकुशल रहेका थिए। आँखा कम देख्ने र कान पनि कम सुन्ने उनलाई घटनाबारे भने केही जानकारी नभएको पाइएको छ।
पानीका कारण डग स्नीफिङ प्रभावकारी भएन
एकै परिवारका ६ जनाको सामूहिक हत्या भएपछि अनुसन्धान गर्न संघीय प्रहरी कार्यालय धरानबाट एसपी भीम दाहालको नेतृत्वको तालिम प्राप्त कुकुरसहितको टोली सोमबार राति घटनास्थल पुगेको थियो।
तालिम प्राप्त ट्रयाकर डग लैला र पिकु लिएर घटनास्थल पुगे पनि पानी परेका कारण डग स्नीफिङ प्रभावकारी हुन नसकेको प्रदेश १ का डीआइजी अरुणकुमार बिसीले बताए।
‘टाढा र विकट भएकाले घटनास्थल पुग्नै एक त लामो समय लाग्यो। त्यसमाथि पनि पानी परेकाले डग स्नीफिङ प्रभावकारी हुन सकेन’ डीआइजी बिसीले नेपाल लाइभसँग भने।
पानी परेकाले गन्ध पखालिने र शंकास्पद व्यक्ति पहिचान गर्न कुकुरलाई समेत गाह्रो हुनेगर्छ।अर्कोतर्फ लामो समय भएकाले हत्याराको गन्ध पनि कुकुरले पहिल्याउन गाह्रो हुनेगर्छ।
उता प्रदेशबाट पनि इन्सपेक्टर बबिन्द्र नेम्वाङको नेतृत्वमा एक टोली हिजै घटनास्थल पुगिसकेको छ। उक्त टोलीले पनि विभिन्न कोणबाट अनुसन्धान गरिरहेको छ।
हत्याको आशंका आर्थिक कारण!
घटनास्थल पुगेको प्रहरी स्रोतका अनुसार कार्की परिवारको घरमा रकम रहेको आशंकामा डाँका गर्न आएका व्यक्तिबाट हत्या भएको हुनसक्ने प्रारम्भिक अनुसन्धान देखिएको हो।
प्रहरी स्रोतका अनुसार हत्या भएका तेजबहादुर कार्कीको परिवारले झापामा ८० लाख बराबरको जग्गा किन्ने तयारीमा थियो। त्यसका लागि केही रकम बैनासमेत गरेको पाइएको छ। हत्या भएका तेजबहादुर कार्कीका दुई छोरा रमेश र नरेश वैदेशिक रोजगारीमा विदेशमा छन्। रमेश मलेसियामा छन् भने नरेश दुबईमा छन्। प्रहरी स्रोतका अनुसार उनीहरुले झापामा जग्गा किन्न लागि भनेर केही दिन पहिला पैसासमेत पठाएको पाइएको छ।
‘जग्गा किन्नका लागि भनेर उनीहरु दुबै जनाले पैसा पठाएको पाइएको। रकम निकालेर घरमा ल्याएर राखेको भन्नेसम्म बुझ्न आएकाले हत्याको कारण आर्थिक पाटो हुन्सक्ने हाम्रो प्रारम्भिक अनुसन्धान छ’ एक प्रहरी अधिकारीले नेपाल लाइभसँग भने।
यता मृतक तेजबहादुर कार्कीका भाइ तिलक कार्कीले समेत जग्गा किन्ने तयारी रहेको बताएका छन्। उनी तेह्रथुम बस्दै आएका थिए। घटना भएको जानकारी पाउनसाथ आजै घर पुगेका छन्। उनले नेपाल लाइभसँग भने, ‘कसैसँग दुश्मनी भएको अहिलेसम्म थाहा छैन। कसले किन हत्या गर्यो भन्ने रहस्यम नै छ।’
तिलकले पनि जग्गा किन्ने तयारी गरिरहेको बताएका छन्। तिजपछि झापामा किन्न लागेको जग्गा पास गर्ने तयारी रहेको उनले बताए। प्रहरीले घटनास्थल सुरक्षित गरेर राखेकोले अहिलेसम्म कसैलाई पनि घरमा प्रवेश गर्न दिएको छैन। पैसा राखिएको दराज तोडफोड भएको वा रकम नभेटिएको अवस्थामा आर्थिक पाटोकै कारण हत्या भएको हुनसक्ने पक्ष झन् मजबुद हुने उनी बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
