काठमाडौं– नेपाल र भारतबीचको पहिलो मैत्रीपूर्ण खेल १–१ गोलको बराबरीमा रोकिएको छ।
त्रिपुरेश्वरस्थित दशरथ रंगशालामा भएको खेलको पहिलो हाफमा अग्रता लिएको नेपालले त्यसलाई जोगाउन नसक्दा खेल १-१ को बराबरीमा रोकिएको हो। नेपालका लागि अन्जन विष्टले शुरुवाती गोल गरे भने भारतका लागि अनिरूध थापाले गोल गर्दै खेल बराबरीमा ल्याए।
खेलको चौथो मिनेटमा अन्जन बिष्टको क्रसलाई भारतीय गोलरक्षकले सहजै नियन्त्रणमा लिएका थिए। २४औं मिनेटमा ब्रँनडन फर्नान्डेसको कर्नरलाई गोलक्षक किरण चेम्जोङले पञ्च गरेका थिए। २६औं मिनेटमा आयुष घलानको क्रसलाई फरवार्ड नवयुग श्रेष्ठले जज गर्न सकेनन्।
३२औं मिनेटमा सुमन लामालाई फाउल गरेपछिको प्राप्त फ्री किकमा अन्जनको प्रहार आकासिँदा नेपाल अग्रता लिनबाट चुकेको थियो। ३६औं मिनेटमा भारतीय गोलरक्षकले गरेको गल्तीको फाइदा उठाउँदै अन्जन विष्टले गोल गरे।
चिनलेना सिंह कोन्सामको ब्याकपासलाई गोलरक्षक गुरुप्रित सिंह सन्धुले नियन्त्रणमा लिन नसकेको बललाई बिट गर्दै विष्ट गोल गर्न सफल भएका हुन्।
४७औं मिनेटमा पुजन उपरकोटीले गरेको प्रहार पोस्टमाथिबाट बाहिरिएको थियो। ५०औं मिनेटमा डिबक्सभन्दा बाहिर गएर बल बचाउने क्रममा किरण चेम्जोङले पहेँलो कार्ड पाएका थिए। लगत्तै अनिरूध थापाले प्रहार गरेको फ्रि किक बललाई किरणले पञ्च गरेर बचाए।
६१औं मिनेमा भारतले बराबरी गोल फर्कायो। कप्तान सुनिल क्षेत्रीले प्रहार गरेको बललाई किरणले पञ्च गरेपनि थापाले गोललाइनबाट गोल गरे।
६९औं मिनेटमा कप्तान क्षेत्री बाहिरिएका थिए। उनलाई बिपिन सिंहले परिवर्तन गरेका थिए। लगत्तै नेपालको तर्फबाट पनि अन्जनको स्थानमा सुरज ज्यू ठकुरीलाई परिवर्तन गरिएको थियो।
८६औं मिनेटमा भारतका रहिम अलिले गरेको प्रहारले पोस्टको दिशा लिन सकेन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
