काठमाडौं- महिला उद्यमीहरुको पाँचौं अन्तर्राष्ट्रिय व्यापार मेला 'भर्चुअल' माध्यमबाट सुरु भएको छ।
महिला उद्यमी महासंघ नेपालले आयोजना गरेको महिला उद्यमीहरुको पाँचौं अन्तर्राष्ट्रिय व्यापार मेलाको बुधबार प्रधानमन्त्री शेरबहादुर देउवाले उद्घाटन गरेका हुन्।
'भर्चुअल' माध्यमबाट मेलाको उद्घाटन गर्दै प्रधानमन्त्री देउवाले महिला उद्यमीहरुको समस्या सरकारले सुन्ने बताए। उनले सबैको सहकार्यमा नेपालको अर्थतन्त्रमा देखिएको शिथिलतालाई अन्त्य गर्नुपर्ने बताए। मुलुकको समग्र विकासका लागि उद्यमीहरुलाई प्रोत्साहन गर्नुपर्ने र त्यसका निम्ति सरकार तयार रहेको उनले उल्लेख गरे।
‘तपाईं हामी सबैको सहकार्यमा अर्थतन्त्रमा देखिएको शिथिलतालाई अन्त्य गर्नुपर्छ। सरकारले तपाइहरुको समस्या सुन्नेछ। सरकारले निजी क्षेत्रको सहकार्यमा कोरोनापछिको अर्थतन्त्रलाई पुनर्उत्थान गर्नेछ। मुलुकको समग्र विकासका लागि उद्यमीहरुलाई प्रोत्साहन गर्नैपर्छ। सरकारले उद्यमीहरुलाई सहयोग गर्न तत्पर छ,' प्रधानमन्त्री देउवाले भने।
महासंघकी प्रथम उपाध्यक्ष निरु रायमाझी खत्रीले महासंघले विगत चार वर्षदेखि भौतिक उपस्थितिमा प्रदर्शनी गर्दै आएको भए पनि यस वर्ष कोरोना संक्रमणको महामारीका कारण 'भर्चुअल' माध्यमबाट गर्नुपरेको बताइन्। मेलामा हस्तकला, कृषि र खाद्य, व्यापार, सेवा चार किसिमका वस्तुहरुको प्रदर्शनी हुने उनले जानकारी दिइन्। भर्चुअल माध्यमबाट हुने प्रदर्शनीमा महिला उद्यमीहरु सहभागी हुने र अनलाइनमार्फत् महिला उद्यमीले उत्पादन गरेका सामग्रीहरुको प्रचारप्रसार गरिने उनले बताए। मेला भदौ २१ गतेसम्म चल्ने महासंघले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
