काठमाडौं- परीक्षार्थीमाथि अन्याय गरेको भन्दै बागमती प्रदेश लोकसेवा आयोगको कार्यालयविरुद्ध सर्वोच्च अदालतमा रिट दायर भएको छ। अधिवक्ता कृष्ण महराले विद्यार्थीको तर्फबाट बुधबार सर्वोच्च अदालतमा रिट दर्ता गरेका हुन्। उनले रिटको पेसी बिहीबारलाई तोकिएको जानकारी दिए।
रिटमा अन्तरिम आदेशसहित उत्प्रेषण लगायत अन्य उपयुक्त आदेश माग गरिएको छ। गत जेठ २९ मा प्रथम चरणको नतिजासमेत प्रकाशित भइसकेको अवस्थामा द्वितीय चरणको परीक्षा सञ्चालन हुनै लाग्दा सुरुमा विज्ञापन गरिएका पदहरु कानुनी आधारबिनै घटाएकोले प्रदेश लोकसेवा आयोग ऐनविपरीत हुनेगरि प्रदेश लोकसेवा आयोगले साउन १७ गते गरेको सूचना बदर गर्न रिटमा माग गरिएको छ।
बागमती प्रदेश लोकसेवा आयोगले गत माघ १२ गते विज्ञापन नम्बर २३३–०७७/७८ प्रशासन सेवा, सामान्य प्रशासन समूह अधिकृत छैठौँमा ४४ जना र विज्ञापन नम्बर २३४–०७७/७८ मा ११ जनाको दरखास्त आह्वान गरेको थियो।
खुलातर्फ मात्रै ४४ जनाको विज्ञापन गरेपछि झण्डै तीन हजारले दरखास्त दिएका थिए। ‘कतिपय साथीहरूको त सरकारी सेवा प्रवेश गर्ने ३५ वर्ष उमेर समेत पार हुँदैछ। यस्तो अवस्थामा प्रदेश लोकसेवा आयोगले हठात् आफ्नै कानुन विपरीत सिट संख्या घटाइदिँदा नेपालको संविधानको धारा ३३ ले प्रदान गरेको रोजगारीको हकसमेत हनन् भएको हुँदा म लगायत सयौँ विद्यार्थीहरुको मौलिक हकमा गम्भीर आघात परेकोले न्यायिक उपचारको लागि यस सम्मानित अदालतको शरणमा आउन बाध्य भएको छु,’ निवेदक विद्यार्थीले दायर गरेको रिटमा भनिएको छ।
प्रदेश लोकसेवा आयोग ऐन २०७६ विपरीत बागमती प्रदेश लोकसेवा आयोगले एक चरणको परीक्षा सञ्चालन गरी नतिजासमेत प्रकाशित गरिसकेको अवस्थामा खुलातर्फ ४४ सिटबाट १८ सिट बनाइनु र महिलातर्फ ११ सिटबाट ७ सिटमा झार्नु रोजगारीको हक हनन् मात्रै नभई बागमती प्रदेश लोकसेवा आयोगले प्रदेश लोकसेवा आयोग ऐन २०७६को उल्लंघन गरेको रिटमा दाबी गरिएको छ।
बागमती प्रदेश लोकसेवा आयोग ऐन २०७६ को दफा २३ र २६ को उल्लंघन भएको भन्दै बागमती प्रदेश लोकसेवा आयोग, हेटौँडाको सूचना नम्बर ९-०७८/७९, मिति २०७८ साउन १७ को माग संशोधन सम्बन्धी सूचना अमान्य घोषित गरिनुपर्ने रिटमा माग गरिएको छ।
प्रदेश लोकसेवा आयोगले भोलिदेखि अधिकृत छैठौँ तहको दोस्रो चरणको परीक्षा सञ्चालन गर्दैछ। जसमा प्रथम चरण पास गरेका एक हजार ६ सय ८४ जना परीक्षार्थी सहभागी हुँदैछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
