काठमाडौं– महानगरपालिकाले फोहोर नउठाउँदा राजधानी काठमाडौंका मुख्य बजार र चोक दुर्गन्धित भएका छन्। दुर्गन्धका कारण स्थानीयबासी, व्यवसायी र पैदलयात्री सबैलाई सकस भएको छ।
काठमाडौंमा फोहोर नउठेको करिब दुई हप्ता भइसकेको छ। नुवाकोटको सिसडोलस्थित ल्यान्डफिल साइट जाने सडक वर्षाका कारण बिग्रिएकोले त्यहाँ फोहोर लैजान नसकेको महानगरले जनाएको छ। नुवाकोटको ओखरपौवाबाट सिसडोल जाने सडक बिग्रिएको हो।
लामो समय फोहोर नउठेको कारण घरबाहिर निस्कँदा नाक थुन्नु पर्ने अवस्था रहेको बानेश्वर पिपलबोट नजिकै बस्ने राधा ढकाल बताउँछिन्। ‘तरकारी किन्न आउँदा र कार्यालय जाँदा आउँदा फोहोर गन्हाएर हैरान भइएको छ, महानगरले हाम्रो स्वास्थ्यमाथि हेलचेक्र्याईं गरेको छ,’ उनले भनिन्।
पद्मकन्या कलेज, बागबजारअगाडि पनि फोहोरको थुप्रो लागेको छ। त्यहाँ स्नातक तहमा अध्ययनरत सारिका श्रेष्ठले फोहोरको गन्ध कलेज भित्रसम्म पुग्ने बताइन्। उनले भनिन्, ‘कर उठाउन घर-घरमा बाजा बजाइरहेको महानगरलाई फोहोर उठाउन लगाउन जनताले पनि बाजा बजाएरै जानुपर्ने हो?’
यता, प्रधानमन्त्री शेरबहादुर देउवाले काठमाडौंमा फोहोर थुप्रिएकाले जतिसक्दो छिटो आवस्यक व्यवस्थापन गरेर फोहोर उठाउने प्रवन्ध गर्न काठमाडौं महानगरपालिकाका मेयर र उपमेयरलाई आग्रह गरेका छन्।
सोमबार बिहान प्रधानमन्त्री निवास बालुबाटारमा काठमाडौंका मेयर विद्यासुन्दर शाक्य र उपमेयर हरिप्रभा खड्कीलाई बोलाएर प्रधानमन्त्रीले फोहोर कसरी उठाउन सकिन्छ त्यो अनुसार प्रवन्ध गर्न भनेका हुन्।
‘संघीय सरकारको तर्फबाट पूर्ण सहयोग हुन्छ, तर फोहोर उठाउने व्यवस्था तत्काल गराउनुहोस्’, प्रधानमन्त्री देउवाले उनीहरुलाई भने।
अरु सरकारी निकायबाट पनि आवश्यक समन्वय हुने भन्दै प्रधानमन्त्री देउवाले कसरी हुन्छ काठमाडौंको फोहोर उठाउने व्यवस्था गर्न आग्रह गरे।
महानगरपालिकाकी उपप्रमुख खड्गीले अब केही दिनभित्र नै फोहोर उठिसक्ने बताइन्। ‘हामीले वातावरण विभाग प्रमुखसहित अन्य कर्मचारीसँग छलफल गरेर अबको ५/६ दिनभित्र सबै क्षेत्रको फोहोर उठाउने सल्लाह भएको छ’, उनले भनिन्।
यसमा महानगरका मेयरलाई नै दोषारोपण गर्दै खड्गीले भनिन्, ‘मिडियामा यसबारे पटक-पटक समाचार आउँदा पनि मेयरबाट पहल भएको छैन। अहिलेको सरकारलाई बदनाम गर्न समाधानको पहल नगरिएको होला।’
महानगरपालिकाका वातावरण विभाग प्रमुख हरिकुमार श्रेष्ठले फोहोर नउठेको नभइ जति उठ्नुपर्ने त्यति नउठेको बताए। उनले भने, ‘यसअघि दैनिक डेढ सय गाडीसम्म फोहोर उठ्थ्यो। अहिले ५० गाडी मात्र उठेको छ।’ महानगरका अनुसार ल्यान्डफिल साइटसम्म पुग्ने करिब सय मिटर सडक बिग्रिएको छ। यसअघि थुपारिएको फोहोरमाथि नै सडक बनाइँदा अहिले समस्या भएको हो। बिग्रिएको सडकमा ढुंगा बिछ्याएपछि सडक खुल्ने महानगरले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
