काठमाडौं– नेपाली कांग्रेसको आसन्न १४औं महाधिवेशनबाट पारित गराउने गरी राष्ट्रिय शिक्षा नीतिको मस्यौदा तयार गरिएको छ। कांग्रेस मातहतको शिक्षा विभागले मस्यौदा तयार पारेको हो। सातवटै प्रदेशबाट विज्ञहरूसँग सुझाव लिई शिक्षा नीति तयार गरी पार्टी सभापति तथा प्रधानमन्त्री शेरबहादुर देउवासमक्ष बुझाइएको छ।
सो शिक्षा नीतिलाई पार्टीको शिक्षा विभागले शनिबार पत्रकार सम्मेलनमार्फत सार्वजनिक गरेको छ। आगामी पाँच वर्षभित्र माध्यमिक तहसम्म निःशुल्क र १० वर्षभित्र समान अवसरको शिक्षा प्रदान गर्ने व्यवस्था मिलाइने शिक्षा नीतिमा प्रस्ताव गरिएको छ।
विद्यालय शिक्षामा माध्यमिक, आधारभूत र पूर्वआधारभूत तहको प्रस्ताव गरिएको छ। त्यस्तै कक्षा ८ सम्मको शिक्षा अनिवार्य तथा निःशुल्क र कक्षा १२ सम्मको शिक्षा निःशुल्क गर्ने प्रतिबद्धता शिक्षा नीतिमार्फत कांग्रेसले व्यक्त गरेको छ।
शैक्षिक क्षेत्रलाई दलीय राजनीतिक हस्तक्षेपबाट मुक्त राख्ने, प्राज्ञिक व्यक्तिलाई विश्वविद्यालयको कुलपति तथा उपकुलपति बनाउने, विद्यालय तहमा एकै प्रकारका शिक्षक दरबन्दी व्यवस्था गर्ने, उच्च शैक्षिक योग्यता हासिल गरेका स्नातकलाई सिधै शिक्षण पेसामा प्रवेश गराउनेलगायतका योजनालाई सो नीतिमा प्रस्ताव गरिएको छ।
पार्टीका केन्द्रीय सदस्यसमेत रहेका शिक्षा विभाग प्रमुख हरिप्रसाद रिमालले २०७२ सालमा जारी नेपालको संविधानको प्रावधानका आधारमा शिक्षामा आमूल परिवर्तन गर्ने गरी शिक्षा नीतिमा प्रस्ताव गरिएको बताए। उनले पार्टीको आसन्न महाधिवेशनबाट पारित हुन सके यसको कार्यान्वयन सहज हुने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772261485.png)
-1772253460.png)
-1764146706.png)
