काठमाडौं- प्रधानन्यायाधीश चोलेन्द्र शम्शेर राणाले आफू संवैधानिक जिम्मेवारीले संवैधानिक परिषद्को बैठकमा सहभागी भएको बताएका छन्।
संवैधानिक परिषदले गरेका नियुक्तिहरु बदर गर्न माग गर्दै परेका रिटमाथिको सुनुवाइका क्रममा शुक्रबार संवैधानिक इजलासमा जारी बहसमा अधिवक्ता ओमप्रकाश अर्यालले राणामाथि प्रश्न उठाएपछि उनले आफू संवैधानिक जिम्मेवारीका कारण बैठकमा गएको बताएका हुन्।
संवैधानिक परिषद्मा बसेर नियुक्तिमा भागबण्डा लिएको भन्दै प्रधानन्यायाधीश राणालाई इजलास छाड्न बहसमा सुझाव आएसँगै प्रधानन्याधीश राणा रिसाए। इजलासमा राणाले भने, 'भागवन्डा शब्द परिमार्जन गर्नुस्। तपाईंले कसले कसरी नियुक्ति भयो भनेर आरोप लगाउन मिल्दैन। कसले भाग लियो यो मुख्य कुरा होइन।'
'तपाईं भएपनि निर्णय गर्ने हो। तपाईं कालो कोट लगाएर संविधानले दिएर आउनु भयो। म पनि संवैधानिक जिम्मेवारीले गएको हो' इजलासमा उनले भने।
प्रश्नकर्ता अधिवक्तालाई उनले विकल्प दिन भने। 'विकल्प के हो? प्रधानन्यायाधीश नबसोस् भन्ने ठिक हो, तर निकास दिनुस्। तपाईंले समाजमा भ्रम पार्ने काम गर्नुस्' उनले भने।
आफूलाई इजलासमा बसेर प्रतिरक्षा गर्नु नभएको राणाको भनाइ थियो।
'मलाई यसमा बसेर प्रतिरक्षा गर्नु छैन। मेरो संवैधानिक दायित्ववाट चुक्दिन' राणाले भने, ' यसलाई बृहत इजलासमा पठाउँ। बजारको हावामा नलागौं। यसलाई निकास दिउँ। सर्वोच्च अदलात कमजोर छैन। अदालतले बदर गरेका छन्। गलत कुरालाई म साथ दिन्न।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1781591850-1781592603.jpg)
-1764146706.png)
