विश्वकप २०१८ समूह सी– फ्रान्स, अस्ट्रेलिया, पेरु, डेनमार्क।
समूह 'सी' मा सन् १९९८ को विश्वविजेता फ्रान्स तुलनात्मक रुपमा बलियो टिम मानिएको छ। फ्रेञ्च टिममा पाउल पोग्बा, एन्टोनी ग्रिजम्यान, केलियन एमबाप्पे, ओलिभर जिरुउड, उस्मान डेम्बेले, स्यामुयल उम्टिटी जस्ता प्रतिभाशाली खेलाडी छन्। जसले गर्दा फ्रेञ्च टिम सन्तुलित छ।
समूहको हेर्नेलायक खेल फ्रान्स र डेनमार्कको खेललाई लिइएको छ। जुन २६ मा मस्कोमा खेल हुनेछ। दुई टिमबीच यसअघि विश्वकपमा दुई पटक भिडन्त भएको थियो। सन् १९९८ मा फ्रान्सले २–० ले जितेको थियो। सन् २००२ को विश्वकपमा डेनमार्कले फ्रान्सलाई २–० ले हराएको थियो।
के तपाईलाई थाहा छ?
फ्रान्स र पेरुबीच अहिलेसम्म एकपटक मात्र प्रतिस्पर्धा भएको छ। सन् १९८२ मा भएको प्रतिस्पर्धामा पेरुले फ्रान्सलाई १–० गोलले हराएको थियो।
समूहमा रहेका तीन टिम फिफा वरीयतामा समान स्तरमा छन्। वरीयतामा फ्रान्स नवौं स्थानमा, पेरु ११औं स्थानमा, डेनमार्क १२औं स्थानमा छन् भने अस्ट्रेलिया ३९ औं स्थानमा छ।
अस्ट्रेलियाका टिम काहिल चौथो पटक विश्वकप खेल्दैछन्। उनले यसअघिका तीन वटै विश्वकपमा गोल गरेका थिए। यदि उनले रसियामा गोल गर्न सके उनी चौथो विश्वकपमा गोल गर्ने चौथो खेलाडी बन्नेछन्। यसअघि लगातार चौथो विश्वकपमा गोल गर्ने इतास उवे सिलर, पेले र मिरोस्लाभ क्लोसले बनाएका थिए।
समूह 'सी'का चार टिमको विश्वकप इतिहास
फ्रान्स
सन् १९९८ को विश्व विजेता फ्रान्स १५औं पटक विश्व कप खेल्ने तयारीमा छ। युरोप छनोटको समूह ‘ए’ को विजता हुँदै फ्रान्स विश्व कपमा छानिएको हो। फ्रान्सले १९३०, १९३४, १९३८, १९५४, १९५८, १९६६, १९७८, १९८२ र १९८६ को विश्व कप खेलिसकेको छ। सन् १९९८ को विश्व कप आयोजक फ्रान्सले २००२, २००६, २०१० र २०१४ मा पनि सहभागिता जनायो।
डेनमार्क
डेनमार्कले युरोप ‘प्लेअफ’मा आयरल्यान्ड गणतन्त्रलाई ५–१ ले हराएर विश्व कपमा स्थान बनाएको हो। ८ वर्षपछि विश्व कपमा फर्किएको डेनमार्क पाँचौं पटक विश्व कप खेल्ने तयारीमा छ। डेनमार्कले १९८६, १९९८, २००२ र २०१० मा सहभागिता जनाएको थियो। डेनमार्कको विश्व कपमा उत्कृष्ट प्रदर्शन १९९८ मा क्वार्टरफाइनल पुग्नु हो।
पेरु
दक्षिण अमेरिकी छनोटमा पाँचौ भएपछि पेरुले अन्तर महादेशीय ‘प्लेअफ’ खेल्ने अवसर पाएको थियो। ‘प्लेअफ’मा क्यारेबियन क्षेत्रबाट छनोट भएको न्युजिल्यान्डलाई २–० ले पराजित गर्दै पेरुले ३५ वर्षपछि विश्व कपमा स्थान बनाएको हो। यसअघि पेरुले सन् १९८२ मा विश्व कप खेलेको थियो। पेरुले विश्व कप खेल्न लागेको यो पाँचौ पटक हो। १९३० को पहिलो विश्व कप खेलेको पेरुले १९७०, १९७८ र १९८२ मा पनि सहभागिता जनाएको थियो। पेरुको विश्व कपमा राम्रो प्रदर्शन १९७० र १९७८ मा हो। ऊ त्यति बेला दोस्रो चरणसम्म पुगेको थियो।
अस्ट्रेलिया
एसिया छनोटमा सिरियालाई पराजित गर्दै अस्ट्रेलियाले अन्तरमहादेशीय ‘प्लेअफ’ मा स्थान बनाएको थियो। ‘प्लेअफ’ मा कंगारु टोलीले होन्डुरसलाई ३–० गोलले पराजित गरेर विश्व कपमा स्थान बनायो। अस्ट्रेलिया पनि पाँचौ पटक विश्व कप खेल्दै छ। अस्ट्रेलियाले सन् १९७४ मा पहिलो पटक विश्व कप खेलेको थियो। २००६ यता ऊ लगातार विश्व कप खेल्दै आइरहेको छ। अस्ट्रेलिया २००६ को विश्व कपमा अन्तिम १६ मा पुगेको थियो। यो नै उसको अहिलेसम्मको उत्कृष्ट प्रदर्शन हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766305548.png)
-1764146706.png)
-1763721444.png)
