काठमाडौं– रौतहटका पत्रकारद्वय मोजिबुल्लाह र शेख अतिउल्लाहलाई फसाउन लागुऔषध राखिएको घटनामा रौतहटका प्रहरी प्रमुख प्रहरी उपरीक्षक (एसपी) सिद्धिविक्रम शाहलाई बयानका लागि प्रहरी हेडक्वाटर बोलाइएको छ।
प्रहरी हेडक्वाटरले बोलाएपछि एसपी शाहलाई बुधबार काठमाडौं आइपुगेका छन्। निर्दोष पत्रकारलाई मिलेमतोमा लागु औषध राखेर फसाइएको भन्ने घटनामा एसपी शाह र पत्रकार महासंघ रौतहट शाखाका सचिव संजय सहनीबीचको टेलिफोन संवाद बाहिरिएपछि एसपी शाहको भूमिका शंकास्पद देखिएको थियो।
एसपीकै भूमिका शंकास्पद देखिएपछि प्रहरी हेडक्वाटरले एसएसपी कृष्ण महतको नेतृत्वमा छानबिन समिति गठन गरेर यस घटनाको अनुसन्धान सुरु गरेको छ। निर्दोष पत्रकारलाई योजनाबद्ध तरिकाले फसाएको घटनामा रौतहटमा कार्यरत असई उदयप्रसाद यादव र जवान मनोजसान कानु निलम्बनमा परिसकेका छन्।
प्रहरीकै मिलेमतोमा पत्रकार सवार मोटरसाइकलमा लागु औषध राख्ने रौतहटको माधवनारायण नगरपालिका–१ का २४ वर्षीय धीरज यादव र सर्लाही रामनगर गाउँपालिका–१, बहुअर्वा बस्ने २३ वर्षीय जितेशकुमार यादवलाई नियन्त्रणमा लिएर प्रहरीले अनुसन्धान सुरु गरेको छ।
गत साउन ३२ गते गौरबाट पत्रकार मोजिबुल्लाहको बीआर ३० एस १८८७ नम्बरको मोटरसाइकलबाट प्रहरीले लागुऔषध नाइट्राभेट १०५ ट्याब्लेट बरामद गरेको थियो। उक्त मोटरसाइकलमा मोजिबुल्लाह र शेख सवार थिए। लागुऔषधसहित आफूहरुलाई पक्राउ गरेपछि पत्रकारद्वयले आफूहरु निर्दोष रहेको र फसाउनका लागि योजनाबद्ध तरिकाले लागुऔषध राखिएको बताएका थिए।
पछि उनीहरुलाई फसाउन लागुऔषध राखिएको भन्ने विषय सार्वजनिक भएपछि पत्रकार महासंघ रौतहटलगायतले घटनालाई गम्भीर रुपमा लिँदै छानबिन गर्नुपर्ने माग राखेका थिए।
महासंघको रौतहट शाखाले घटनास्थलको सीसीटीभी फुटेजसमेत निकालेर हेरेको थियो। सीसीटीभी फुटेजमा दुई जना युवा मिलेर पत्रकार सवार मोटरसाइकलमा लागुऔषध राखेको देखिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768395492.png)
-1768391713.png)
-1764146706.png)
