काठमाडौं- रौतहटका पत्रकारद्वय मोजिबुल्लाह र शेख अतिउल्लाहलाई फसाउन लागुऔषध राखिएको घटनामा रौतहटका प्रहरी प्रमुखकै भूमिका शंकास्पद देखिएको छ। उक्त प्रकरणमा जिल्ला प्रहरी कार्यालय रौतहटका प्रहरी उपरीक्षक (एसपी) सिद्धिविक्रम शाहको भूमिका शंकास्पद देखिएको हो।
गत साउन ३२ गते गौरबाट मोजिबुल्लाहको बीआर ३० एस १८८७ नम्बरको मोटरसाइकलबाट प्रहरीले लागुऔषध नाइट्राभेट १०५ ट्याब्लेट बरामद गरेको थियो। उक्त मोटरसाइकलमा मोजिबुल्लाह र शेख सवार थिए। लागुऔषधसहित आफूहरुलाई पक्राउ गरेपछि पत्रकारद्वयले आफूहरु निर्दोष रहेको र फसाउनका लागि योजनाबद्ध तरिकाले लागुऔषध राखिएको बताएका थिए।
पछि उनीहरुलाई फसाउन लागुऔषध राखिएको भन्ने विषय सार्वजनिक भएपछि पत्रकार महासंघ रौतहटलगायतले घटनालाई गम्भीर रुपमा लिँदै छानबिन गर्नुपर्ने माग राखेका थिए।
महासंघको रौतहट शाखाले घटनास्थलको सीसीटीभी फुटेजसमेत निकालेर हेरेको थियो। सीसीटीभी फुटेजमा दुई जना युवा मिलेर पत्रकार सवार मोटरसाइकलमा लागुऔषध राखेको देखिएको थियो। यसरी लागुऔषध राख्नेमा रौतहटको माधवनारायण नगरपालिका-१ का २४ वर्षीय धिरज यादव र सर्लाही रामनगर गाउँपालिका-१, बहुअर्वा बस्ने २३ वर्षीय जितेशकुमार यादव रहेको खुलेको थियो।
उनीहरुले पत्रकारद्वयको मोटरसाइकलमा लागुऔषध राख्दा रौतहट प्रहरी कार्यालयमा कार्यरत असई उदयप्रसाद यादव र जवान मनोजसान कानु नजिकै उभिएर घटना नियालिरहेका थिए। असई यादव र जवान कानु सादा पोसाकमा थिए।
त्यसपछि पत्रकारद्वयलाई असई यादव र जवान कानुले पक्राउ गरेका थिए। अहिले भने सो घटनामा नयाँ 'ट्वीस्ट' आएको छ। अहिले सार्वजनिक भएको एउटा अडियोले घटनामा एसपी शाहदेखि पत्रकार महासंघ रौतहट शाखाकै एक पत्रकारलाई समेत शंकाको घेरामा तानेको छ।
यस घटनाबारे रौतहट प्रहरीले सोमबार पत्रकार सम्मेलन गरेर पहिला पक्राउ गरेका पत्रकारद्वय निर्दोष रहेको जनाकारी दिएको थियो। घटनामा निर्दोषलाई फसाउन खोजेको भन्दै प्रहरीले लागुऔषध राख्ने धिरज र जितेशकुमारलाई पक्राउ गरी आपराधिक षड्यन्त्र मुद्दामा रौतहट जिल्ला अदालतबाट सात दिनको म्याद लिएर अनुसन्धान सुरु गरेको छ। दुई प्रहरीलाई निलम्बन गरी अनुसन्धान सुरु गरिएको छ।
घटनाको योजनाकार पत्रकार महासंघ रौतहट शाखाका सचिव सञ्जय सहनी रहेको रौतहटका एसपी शाहले बताएका थिए। सहनीको योजनामा घटना भएको सार्वजनिक भएपछि एक अडियो बाहिरिएको थियो।
अडियोमा एसपी शाह र उक्त घटनाका योजनाकार भनिएका सहनीबीचको टेलिफोन संवाद समेटिएको छ। उनीहरुबीचको संवादले उक्त घटनामा एसपी शाहकै भूमिकामा प्रश्न उब्जाएको छ।
द नेपाल मिडिया डटकमले सार्वजनिक गरेको एसपी शाह र सहनीबीचको फोन संवाद यस्तो छ:
पत्रकार सहनी- हेलो।
एसपी शाह- हेलो।
पत्रकार सहनी- सर नमस्ते।
एसपी शाह- कता हो सञ्जयजी?
पत्रकार सहनी- गौरमै सर।
एसपी शाह- एक्लै हो?
पत्रकार सहनी- हो सर, एक्लै हो।
एसपी शाह- (हाँस्दै) हिजो काम त भो नि त। हैन?
पत्रकार सहनी- हजुर?
एसपी शाह- हिजो काम भएछ नि।
पत्रकार सहनी- भइहाल्छ नि सर भइहाल्छ। (त्यसपछि एसपी शाह हाँस्छन्।) औकातभन्दा बढी मान्छे हुनुहुँदैन।
एसपी शाह- ठीक छ।
पत्रकार सहनी- कसले फोन गर्नुभएको थियो?
एसपी शाह- हँ?
पत्रकार सहनी- सरलाई कसले फोन गर्नुभएको थियो?
एसपी शाह- के रे?
पत्रकार सहनी- कसले फोन गर्नुभएको थियो हजुरलाई?
एसपी शाह- ए हैन, तत्कालै त्यो असईले मलाई फोन गरेको थियो नि।
पत्रकार सहनी- ए ए! जे होस् हजुरको दूतहरु राम्रो छ एकदम।
एसपी शाह- अहिले काम गर्यो राम्रो भयो। जसको अहितमा काम गर्यो उसले नराम्रो भन्न थालिहाल्छ नि।
उक्त अडियोमा बोलेको आवाज आफ्नै भएको एसपी शाहले स्वीकार गरेका छन्।
शंकास्पद अडियो बाहिरिएपछि यसबारे हामीले प्रहरी प्रधान कार्यालयसँग पनि चासो राखेका थियौं। नेपाल प्रहरीका प्रवक्ता, एसएसपी वसन्त कुँवरले उक्त विषयमा छानबिन हुने र दोषी पाइए कारबाही हुने बताए।
तर, अडियोलाई मात्रै लिएर कोही दोषी वा निर्दोष भन्न अहिले नै नसकिने एक प्रहरी अधिकृतले बताए। ‘एसपी शाहलाई घटनाको पूर्वजानकारी हुनु र सोहीअनुसार काम भइसकेपछि टेलिफोन संवाद भएको अवस्थामा उनको भूमिका शंकास्पद हुने ठाउँ छ,’ ती प्रहरी अधिकृत भन्छन्, ‘तर, निर्दोष पत्रकारलाई फसाउने त्यस घटनामा एसपी शाहलाई कुनै जानकारी नै नहुने र सुराक दिने मान्छेलाई काम भइसकेपछि धन्यवाद भन्नुलाई नै एसपीको मिलेमतोमा काम भएको भन्नसक्ने अवस्था रहँदैन।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768291693.png)
-1764146706.png)
