काठमाडौं- रौतहटका पत्रकारद्वय मोजिबुल्लाह र शेख अतिउल्लाहलाई फसाउनका लागि प्रहरीकै योजानमा उनीहरु सवार मोटरसाइकलमा लागूऔषध राखिएको पुष्टि भएको छ ।
गत साउन ३२ गते मोटरसाइकलमा राखिएको लागूऔषध नाइट्राभेट १०५ ट्याब्लेटसहित उनीहरुलाई प्रहरीले पक्राउ गरेको थियो । अनुसन्धानका क्रममा उनीहरु दुईजना निर्दोष पाइएको जिल्ला प्रहरी कार्यालय रौतहटले जनाएको छ।
एसपी सिद्धिविक्रम शाहका अनुसार मोजिबुल्लाह र शेखलाई फसाउन नेपाल पत्रकार महासंघ जिल्ला शाखा रौतहटका सहसचिव संजय सहनीको निर्देशन उक्त मोटरसाइकलमा लागूऔषध राख्न लगाइएको थियो।
लागूऔषध राख्न सहनीले रौतहट माधवनारायण नगरपालिका-१ का २४ वर्षीय धिरज यादव र सर्लाही रामनगर गाउँपालिका-१ बहुअर्वा बस्ने २३ वर्षीय जितेशकुमार यादवलाई प्रयोग गरेको पाइएको एसपी शाहले जानकारी दिए।
उनका अनुसार लागूऔषध राखेपछि उनीहरुले रौतहटमै कार्यरत सादा पोशाकका असई उदयप्रसाद यादव र जवान मनोज साह कानुलाई बोलाई पक्राउ गर्न लगाएका थिए।
लागूऔषध राख्ने धिरज र जितेशलाई अपराधिक षड्यन्त्र लागूऔषध मुद्धामा अदालतबाट ७ दिनको म्याद लिएर अनुसनधान सुरु गरिएको छ ।
यस्तै, असई उदय र जवान मनोजलाई निलम्बन गरी अनुसन्धान सुरु गरिएको एसपी शाहले बताए ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
