काठमाडौं– लामो समयदेखिको बक्यौता कर उठाउन काठमाडौं महानगरपालिकाले घरदैलो अभियान सुरु गर्ने भएको छ। बारम्बार सूचना जारी गर्दा पनि घरजग्गा र सम्पत्ति कर नतिर्ने ठूला करदाताबाट कर असुल गर्न भदौ ९ गतेदेखि पञ्चेबाजासहित घरदैलो अभियान सुरु गर्ने महानगरले जनाएको छ।
कर असुल गर्न बुधबारदेखि पञ्चेबाजासहितको टोली कर नतिर्नेको घरमै पुग्ने महानगरपालिकाका प्रवक्ता ईश्वरमान डंगोलले बताए। लोक तथा दोहोरी गीत बजाएर घरजग्गा र सम्पत्ति कर नतिर्ने ठूला करदातासमक्ष पुग्ने र कर नतिर्ने करदाताका बारेमा गीतमार्फत नै जानकारी गराउने उनको भनाइ छ।
महानगरले पटक–पटक सूचना सार्वजनिक गर्दा पनि सम्बन्धित निकाय सम्पर्कमा नआएपछि यस्तो तयारी थालेको प्रवक्ता डंगोलले बताए।
काठमाडौं महानगरपालिकाले यसअघि गत असार १६ गते र साउन २६ गते कर नतिर्ने ठूला करदाताको नाम सार्वजनिक गरी ३० दिनभित्र सम्पर्क गर्न आग्रह गरेको थियो। असार १६ गते पहिलो चरणमा कर तिर्न आनाकानी गरेका २० ठूला करदाताको नाम सार्वजनिक गरिएको थियो भने साउन २६ गते दोस्रो चरणमा ७२ ठूला करदाताको नाम महानगरले सार्वजनिक गरेको थियो।
महानगरले नाम सार्वजनिक गर्दै ३० दिनभित्र सम्पर्क गर्न आग्रह गर्दा पनि करदाताले बेवास्ता गरेपछि यो पटक यस्तो तयारी थालिएको प्रवक्ता डंगोलको भनाइ छ।
कर तिर्न बाँकी करदातालाई आफ्नो विवरण लिएर सम्पर्कमा आए नियमअनुसार दिइने कर छुट सुविधासमेत उपलब्ध हुने महानगरले जनाएको छ। महानगरले यस अभियानमा ७० करोड रुपैयाँ असुल गर्ने लक्ष्य लिएको प्रवक्ता डंगोलले बताए।
सूचना सार्वजनिक गरेयता हालसम्म करिब तीन करोड रुपियाँ बक्यौता रकम असुल भएको उनले जानकारी दिए। सूचनापछि सम्पर्कमा आएका व्यापारिक प्रतिष्ठानले पहिलो चरणमा एक करोड ५३ लाख राजस्व बुझाएको महानगरले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
