मस्को (एजेन्सी)– रसिया विश्वकप फुटबल प्रतियोगिता २०१८ मा छानिएका ३२ वटै टिमले तयारी अन्तिम चरणमा पुर्याएका छन्। सवै देशले २३ सदस्यीय राष्ट्रिय टिम घोषणा गरिसकेका छन्। जेठ ३१ देखि सुरु हुने प्रतियोगितामा सबै देशले उत्कृष्ट प्रदर्शन गर्न सम्पूर्ण शक्ति खर्च गर्दैछन्।
प्रतियोगिताअघि अन्तर्राष्ट्रिय फुटबल महासंघ (फिफा) ले सर्वोत्कृष्ट खेलाडीको अवार्डका दाबेदारको सम्भावित नाम सार्वजनिक गरेको छ। गत सिजन गरेको प्रदर्शनका आधारमा फिफाले पाँच सुपरस्टार खेलाडीबारे लेखेको हो। जुन खेलाडीले विश्वकपमा गरेको प्रदर्शनको आधारमा आगामी वर्षको फिफा वर्ष खेलाडीको अवार्ड समेत जित्न सक्नेछन्।
क्रिस्टियानो रोनाल्डो – पोर्चुगल
फिफा वर्ष खेलाडी क्रिस्टयानो रोनाल्डोले चौथो पटक विश्वकप खेल्न लागेको हुन्। पोर्चुगलका कप्तान समेत रहेका रोनाल्डो आफ्नो देशलाई अर्को उपाधि जिताउन चाहान्छन्। युरो २०१६ को उपाधि पोर्चुगलले उचाल्दा रोनाल्डोले प्रेरणादायी प्रदर्शन गरेका थिए।
पोर्चुगलले समूह चरणको पहिलो खेल स्पेन विरुद्ध खेलेर सुरुवात गर्दैछ। युरोपियन च्याम्पियन पोर्चुगल र पूर्व विश्वविजेता स्पेन बीचको खेल रोमाञ्चक हुने अपेक्षा गरिएको छ। समूह 'बी' रहेको पोर्चुगलले दोस्रो खेल मोरक्कोसँग तथा अन्तिम खेल इरानसँग खेल्दैछ। समूह चरणमा पहिलो खेल नै बलियो टिमसँग भएकाले पोर्चुगल तथा रोनाल्डोको भाग्य त्यहि खेलले कोर्ने फुटबल पण्डितको दाबी छ।
लिओनल मेसी – अर्जेन्टिना
गत संस्करणको विश्वकपको फाइनलमा अर्जेन्टिनालाई जर्मनीले १–० ले पराजित गरेको थियो। फाइनल पुगेर पनि पराजित हुँदाको पिडा अर्जेन्टिनाले अहिलेसम्म भुलेको छैन। लगत्तै दुई वटा कोपा अमेरिका फाइनलमा पराजित भएपछि कप्तान लिओनल मेसीले संन्यासको घोषणा गरेका थिए। तर फ्यानको तथा शुभचिन्तकको आग्रहपछि संन्यास फिर्ता गरेका मेसीको सपना भनेको विश्वकपको ट्रफी उचाल्ने हुनेछ। अर्जेन्टिनाले विश्वकपको पहिलो खेल नवप्रवेशी टिम आइसल्यान्डसँग खेल्नेछ। समूह 'डी' मा रहेको उसले दोस्रो खेल क्रोएसिया र अन्तिम खेल नाइजेरियासँग खेल्नेछ।
थोमस मुलर – जर्मनी
मुलरले व्यक्तिगत र देशका लागि यसअघि नै धेरै उपलब्धि हासिल गरिसकेका छन्। सन् २०१० मा दक्षिण अफ्रिकामा भएको विश्वकपा उनले गोल्डेन बुट जितेका थिए। सो विश्वकपमा जर्मनी तेस्रो बनेको थियो। गत सिजन त जर्मनी च्याम्पियन नै बन्यो। सन् २०१८ को विश्वकपमा सहभागी खेलाडी मध्ये मुलर विश्वकपमा बढी गोल गर्ने खेलाडीमा पर्छन्। उनले १० गोल गरेका हुन्।
करिअरको अन्त्यतिर आइपुगेका मुलरका लागि रसिया विश्वकप अर्को अवसर हो। रसियामा गरेको प्रदर्शनका आधारमा उनको खेल जीवनको आगामी बाटो तय हुनेछ।
नेइमार – ब्राजिल
सन् २०१४ मा घरेलु मैदानमा आयोजना भएको विश्वकप जित्ने ब्राजिलको सपना पूरा हुन सकेन। सेमिफाइनलमा जर्मनीसँग ७–१ ले पराजित भएको क्षण ब्राजिल र उसका सुपरस्टार खेलाडी नेइमारले अहिलेसम्म भुल्न सकेका छैनन्।
यसपटकको विश्वकपमा ब्राजिलको भरोसा विश्वकै महँगा खेलाडी नेइमारमाथि छ। गत सिजन फिफा वर्ष खेलाडीको तेस्रो बनेका नेइमार भर्खर चोटबाट फर्किएका छन्। तर गत साता उनले उत्कृष्ट पुनरागमन गर्दै गोल गर्दा समर्थक हौसिएका छन्। समूह 'ई' मा रहेको ब्राजिलले पहिलो खेल स्विट्जरल्यान्डसँग खेल्नेछ। त्यसपछि ब्राजिलले कोस्टारिका र सर्वियासँग प्रतिस्पर्धा गर्नेछ।
मोहम्मद सलेह – इजिप्ट
इजिप्टका फरवार्ड मोहम्मद सलेहले गत सिजन इंग्लिस क्लब लिभरपुलका लागि सानदार प्रदर्शन गरे। उनको उत्कृष्ट प्रदर्शनले लिभरपुले युरोपियन च्याम्पियन्स लिगको फाइनलसम्मको यात्रा तय गरेको थियो। प्रिमियर लिगमा पनि सलेहको प्रदर्शन राम्रो थियो। उनले प्रिमियर लिगमा ३६ खेल खेलेर ३२ गोल गरे।
देशका लागि पनि उत्कृष्ट खेलेका सलेहले छनोटको अन्तिम खेलमा पेनाल्टीमा गोल गरेका थिए। जसका कारण इजिप्टले २८ वर्षपछि विश्वकपमा स्थान बनाउको थियो।
स्पेनिस क्लब रियल म्याड्रिड विरुद्धको फाइनलमा खेल्दा सलेह घाइते भएका थिए। तर पनि उनी राष्ट्रिय टिममा परे। इजिप्टले सलेहले खेल्ने भन्दै समर्थकलाई आग्रह गरिरहेको छ। उनको इजिप्ट समूह 'ए' मा छ। उसले समूह चरणमा उरुग्वेसँग आयोजक रसिया र साउदी अरेबियासँग खेल्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766305548.png)
-1764146706.png)
-1763721444.png)
