.jpg)
फाइल तस्वीर
काठमाडौं– धुलिखेल हुँदै जाने लामो दूरीका ठूला सार्वजनिक सवारी साधन मनोहरा खोला करिडोर वा सल्लाघारीबाट सञ्चालनमा ल्याउन सुझाव दिइएको छ।
काठमाडौं महानगरपालिकाद्वारा गठित यातायात सञ्चालनसम्बन्धी अध्ययन कार्यदलले कोटेश्वरको जाम कम गर्न यस्तो सुझाव दिएको हो।
कामपाको उपप्रमुख हरिप्रभा खड्गीको संयोजकत्वमा गठित ‘कामपा भएर गुड्ने लामो दूरीका सार्वजनिक सवारी साधन व्यवस्थापन अध्ययन समिति’ले तीनबुँदे अध्ययन प्रतिवेदन हस्तान्तरण गर्दै उक्त सुझाव दिएको हो। ठूला सार्वजनिक सवारी साधनको ‘पिक एन्ड ड्रप’ लाई थप व्यवस्थापन गर्नका लागि एक हप्ताअघि महानगरले कार्यदल गठन गरेको थियो।
उक्त कार्यदलले तयार गरेको प्रतिवेदनमा तत्काल सार्वजनिक यात्रुवाहक ठूला सवारी साधनको व्यवस्थापन जडीबुटी पुल पूर्वको मनोहरा खोला करिडोर मर्मत–सम्भार गरी वा सल्लाघारी किनाराबाट धुलिखेल पूर्वतर्फका सार्वजनिक सवारी सञ्चालन गर्न सकिने उल्लेख छ।
संघीय सरकार, प्रदेश सरकार, उपत्यकाभित्रका पालिका र सवारी साधन व्यवसायीको समन्वय, सहकार्य र लागत सहभागितामा सवारी साधनको कार्यप्रकृति तथा सञ्चालन हुने दूरीका आधारमा लामो दूरी र सहरी यातायातका छुट्टाछुट्टै सवारी साधन टर्मिनलको विकास गर्न आवश्यक रहेको पनि प्रतिवेदनमा उल्लेख छ।
हाल कामपाले खुला मञ्चमा सञ्चालित बसपार्क हटाएर सिटी यातायातका लागि ‘पिक एन्ड ड्रप’ र मध्यम दूरीका यातायातलाई नयाँ बसपार्कबाट सञ्चालन गर्ने व्यवस्था गरेको छ।
नेपाल यातायात व्यवसायी राष्ट्रिय महासंघले भने अर्को व्यवस्था नभएसम्मका लागि खुला मञ्चलाई नै साबिकबमोजिम बसपार्कका रुपमा प्रयोग गर्न पाउनुपर्ने माग गरे पनि कामपाले त्यो सम्भव नहुने बताउँदै आएको छ।
काठमाडौं उपत्यकामा सञ्चालन हुने १४ लाख विभिन्न खाले सवारीमध्ये ८० प्रतिशत कामपाका क्षेत्र भएर सञ्चालन हुने प्रतिवेदनमा उल्लेख छ।
खुलामञ्चबाट सञ्चालन भएको बसपार्क गत वैशाख १६ बाट बन्द गरेको थियो । खुलामञ्च बन्द भएपछि यातायात व्यवसायीले उपयुक्त स्थानको माग राख्दै आएका छन्। व्यवसायीको मागका विषयमा अध्ययन गर्न साउन १५ गते बसेको कामपाको ६५औं कार्यपालिका बैठकले उपप्रमुख खड्गीको संयोजकत्वमा पाँच सदस्यीय समिति गठन गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
