काठमाडौं- परराष्ट्र मन्त्रालयले आर्थिक कूटनीतिसम्बन्धी नियोगका कार्यक्रमहरूलाई नतिजामुखी बनाउन 'भर्चुअल' अन्तरक्रिया सम्पन्न गरेको छ।
नेपालको निर्यात व्यापार प्रवर्द्धनमा लक्षित बनाउँदै सरोकारवाला सबै निकायहरूबीच प्रभावकारी समन्वय तथा सहकार्य अभिवृद्धि गर्ने उद्देश्यले अन्तरक्रिया गरिएको मन्त्रालयले जानकारी दिएको छ। साउन २७ देखि २९ सम्म भएको कार्यक्रममा नेपाली निर्यातजन्य वस्तुहरू निकासी गर्ने उद्यमी व्यवसायीहरू र विदेशस्थित नेपाली नियोग प्रमुखहरू तथा अन्य कर्मचारीहरू सहभागी थिए।
परराष्ट्रसचिवको उपस्थितिमा भएको उक्त तीन दिने कार्यक्रममा विदेशस्थित नेपाली नियोग प्रमुखहरू, उद्योग वाणिज्य तथा आपूर्ति मन्त्रालयका प्रतिनिधि, व्यापार तथा निकासी प्रवर्द्धन केन्द्रका प्रतिनिधि तथा निर्यात व्यवसायी महासंघ र विभिन्न वस्तुगत महासंघका प्रतिनिधि रनिर्यात व्यवसायीहरूकोसमेत सहभागिता रहेको मन्त्रालयले जनाएको छ।
कार्यक्रममा नेपालको निर्यात व्यापार प्रवर्द्धनमा व्यवसायी एवं नेपाली नियोगहरू लगायत व्यापार तथा निकासी प्रवर्द्धन केन्द्रको भूमिकाका साथै नेपालको हाल निर्यातको अवस्था, आगामी लक्ष्य र यस कार्यमा नेपाली नियोगहरूसँग गरिएको अपेक्षाबारेमा छलफल भएको थियो। यसैगरी विदेशमा नेपाली निर्यातजन्य वस्तुहरूको बजारको सम्भाव्यता, त्यसका लागि निर्यात व्यवसायी महासंघबाट तथा व्यापार तथा निकासी प्रवर्द्धन केन्द्रबाट गरिएको अपेक्षा सम्बन्धमासमेत छलफल भएको मन्त्रालयले जनाएको छ।
अन्तरक्रिया कार्यक्रमबाट नेपाली नियोग र नेपाली निर्यातजन्य वस्तुका उत्पादक तथा व्यापारीहरूसँगको समन्वय, सहकार्य र सूचना आदानप्रदानमा अभिवृद्धि भइ आगामी दिनमा नेपालको निर्यात वृद्धिमा सघाउ पुग्ने विश्वास मन्त्रालयले लिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775018854.png)
-1764146706.png)
