समूह ए – रसिया, साउदी अरेबिया, इजिप्ट, उरुग्वे
२१ औं विश्ववकप फुटबल प्रतियोगिताको उद्घाटन खेलमा आयोजक रसिया र साउदी अरेबियाबीच प्रतिस्पर्धा हुनेछ। यो खेल समूहको महत्वपूर्ण खेल मानिएको छ। आयोजक रसिया घरेलु मैदानमा राम्रो सुरुवात गर्न चाहान्छ। साउदी अरेबियाका लागि पनि पहिलो खेलमा आयोजकसँग खेल्दा दबाब हुने पक्का छ।
के तपाईलाई थाहा छ?
रसिया र इजिप्टबीच सन् १९९० पछि पहिलो पटक विश्वकपमा प्रतिस्पर्धा हुन लागेको हो। यसअघि सन् १९९० मा इटालीमा भएको विश्वकपमा दुई टीम बीच प्रतिस्पर्धा भएको थियो।
इजिप्टका फरवार्ड मोहमद सलाहले छनोटको अन्तिम खेलमा कंगोविरुद्ध ९४ मिनेटमा गोल गर्दै आफ्नो देशको विश्वकपको टिकट पक्का गरेका थिए।
साउदी अरेबियाका मोहमद अल सलावीले विश्वकप छनोटमा १६ गोल गरेका थिए। ३१ वर्षीय फरवार्ड सलावीसँगै पोल्यान्डका रोबर्ट लिवान्डोवस्की र युएईका अहमेद खालिलले पनि छनोटमा १६–१६ गोल गरेका थिए।
दुई पटकको विश्वविजेता उरुग्वे पहिलो विश्वकपको विजेता हो। सन् १९३० मा पहिलो विश्वकप जितेको उसले सन् १९५० मा दोस्रो पटक उपाधि जितेको थियो।
इजिप्टका गोलकिपर इसाम इल हडारी ४५ वर्षका भए। यदि उनले रसिया विश्वकप खेलेमा रेकर्ड बनाउनेछन्। यसअघि विश्वकप खेल्ने खेलाडी कोलम्बियाका गोलकिपर फार्यड मोन्ड्रागोन हुन्। उनले गत संस्करणको विश्वकप खेल्दा ४३ वर्षका थिए।
समूह 'ए'का चार टिमको विश्वकप इतिहास
रसिया
रसिया यसपालि आयोजकको भूमिकामा विश्व कप खेल्दै छ। रसियाको यो एघारौं विश्व कप सहभागिता हो। सन् १९५८, १९६२, १९६६, १९८६, १९९०, १९९४, २००२ र २०१४ मा विश्व कपमा समावेश भएको रसिया १९६६ मा चौथो भएको थियो, यो नै उसको अहिलेसम्मकै उत्कृष्ट प्रदर्शन हो। १९९० सम्म रुस सोभियत संघको नामबाट विश्व कप खेल्ने गर्यो।
उरुग्वे
उरुग्वे विश्व कप फुटबलको जन्मदाता हो। उरुग्वेले सन् १९३० मा विश्वकप फुटबल आयोजना गरेको थियो। दक्षिण अमेरिकी छनोटमा दोस्रो बनेर १३औं पटक विश्व कपमा सहभागी हुन लागेको उरुग्वे सन् २००२ यतादेखि अनवरत समावेश हुँदै आइरहेको छ। सन् १९३० पछि उरुग्वेले १९५०, १९५४, १९६२, १९६६, १९७०, १९७४, १९८६ र १९९० मा विश्वकप खेल्यो। यस्तै, उसले २००२, २००६, २०१० र २०१४ मा पनि प्रतिस्पर्धा गरेको थियो। उरुग्वे १९३० र १९५० को च्याम्पियन पनि हो।
साउदी अरेबिया
साउदी अरेबिया एसियाको तेस्रो चरणको छनोटअन्तर्गत समूह ‘बी’को उपविजेता बन्दै १२ वर्षपछि विश्व कप खेल्दै छ। सन् २००६ पछि छानिएको साउदीको विश्व कप सहभागिता यो पाँचौं पटक हो। साउदीले १९९४, १९९८, २००२ र २००६ मा प्रतिस्पर्धा गरिसकेको छ। साउदीको राम्रो प्रदर्शन भनेको १९९४ को पहिलो सहभागितामै अन्तिम १६ मा पुग्नु हो। त्यसपछि साउदी समूह चरणबाटै बाहिरिँदै आएको छ।
इजिप्ट
इजिप्ट सन् २०१८ को विश्व कपमा अफ्रिकाबाट छनोट हुने दोस्रो देश हो। अफ्रिकी छनोटको समूह ‘ई’ मा पहिलो भएको इजिप्टले तेस्रो पटक विश्व कप खेल्दैछ। उसले १९३४ र १९९० मा पनि विश्व कप खेलेको थियो। दुवै पटक इजिप्ट पहिलो चरणबाटै घर फर्किएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766305548.png)
-1764146706.png)
-1763721444.png)
