नेता प्रकाशमान सिंहको निवास चाक्सीबारीमा बसेको पौडेल पक्षको बैठक, तस्वीर– युपी लामिछाने
काठमाडौं– नेपाली कांग्रेसका वरिष्ठ नेता रामचन्द्र पौडेल पक्षले 'विधान र मापदण्ड विपरीत आएका' क्रियाशील सदस्यलाई स्वीकार गर्न नसकिने बताएको छ।
नेता प्रकाशमान सिंहको निवास चाक्सीबारीमा मंगलबार बसेको पौडेल पक्षको बैठकले 'विधान र मापदण्ड विपरीत आकाश र पातालबाट आएका' क्रियाशील सदस्यलाई स्वीकार नगर्ने निर्णय गरेको हो।
मंगलबारको बैठकपछि नेता अर्जुननरसिंह केसीले भने,‘आकाश र पातालबाट आएका क्रियाशील सदस्यहरुलाई स्वीकार्न सकिन्न।’
क्रियाशील सदस्यताको विवाद टुंग्याउन पार्टीमा धेरैपटक छलफल भएको उनले बताए। महाधिवेशनको कार्यतालिका पटक–पटक परिमार्जन गर्न पर्नुको कारण आफूहरु नभएको पौडेल पक्षका नेताहरुको दाबी छ।
'कार्यतालिका पाँचौपटकसम्म परिमार्जन भएको छ। परिमार्जनको कार्यतालिका अहिलेसम्म संस्थापन पक्षले ल्याएको हो, हामीले ल्याएको होइन,’ नेता केसीले भने।
पौडेल पक्षले क्रियाशील सदस्यताका सन्दर्भमा विवाद देखिएको ठाउँमा १३औं महाधिवेशनका प्रतिनिधिलाई कायम गर्न सकिने विकल्पलाई दोहोर्याएको छ।
पौडेल पक्षले क्रियाशील सदस्यताको सबै नवीकरण वडा तथा क्षेत्रबाटै आउनुपर्नेमा पनि जोड दिइएको छ। विधानमा भएको व्यवस्था क्रियाशील वितरण र नवीकरणमा लागू हुनुपर्ने पौडेल पक्षको अडान छ।
विधानको व्यवस्था अनुसार भए जुनसुकै कुनै पक्ष भनेर विवाद सिर्जना नहुने पौडेल पक्षका नेताहरुको भनाइ छ।
कोरोना काललाई शुन्य समय मान्ने भनेर अदालतले कर संकलनका लागि आदेश दिएकाले उक्त नजिर कांग्रेसमा लागू नहुने पौडेल पक्षको निचोड छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
