काठमाडौं– नेकपा एमालेका वरिष्ठ नेता माधव कुमार नेपालले साउन ३ गते ठूलै षड्यन्त्र गर्न खोजिए पनि त्यसलाई परास्त गरिएको बताएका छन्।
४३औं पुष्पलाल स्मृति दिवसको अवसरमा शुक्रबार ललितपुरको च्यासलमा आयोजित 'प्रवचन कार्यक्रम'मा बोल्दै नेता नेपालले जसरी पनि शेरबहादुर देउवाको सरकारले विश्वासको मत नपाओस् भनेर गम्भीर षड्यन्त्र गरिएको भएपनि त्यसलाई असफल पारिएको बताए।
'साउन ३ गतेका दिनमा गम्भीर षडयन्त्र भएको थियो। जसरी पनि शेरबहादुर देउवाको सरकारले विश्वासको मत नपाओस्,नपाएपछि विघटन गर्ने मेरो कदम ठीक थिए, दूरदर्शी राजनेता म नै हुँ भनेर डंका बजाउने सोचलाई हामीले असफल बनायौं,' आफ्नै पार्टीका अध्यक्ष एवम् पूर्व प्रधानमन्त्री केपी शर्मा ओलीतर्फ संकेत गर्दै नेपालले भने।
नेता नेपालले आफूहरुले संविधान र न्यायपालिकाको गरिमाको रक्षा गरेको बताए। 'संसद्लाई जोगाइदिएका छौं। संविधानको रक्षा गरेका छौं। न्यायपालिकाको गरिमाको रक्षा गरेका छौं। हामीले जायज काम गरेका छौं। संविधानसम्मत काम गरेका छौं,' नेता नेपालले भने।
नेता नेपालले एमालेको सांसद संख्या १२१ बाट घट्दाघट्दा ८३ मा पुगेको पनि टिप्पणी गरे। 'अझै कति घट्ने हो ठेगान छैन। जसले पार्टीलाई व्यवस्थित गर्न सक्दैन। पार्टीको अन्तरविरोधको ठीक पहिचान गर्न सक्दैन। अनि त्यसले समाजको अन्तरविरोधको के समाधान गर्न सक्छ?', नेता नेपालले भने।
नेपालले पार्टीभित्रको अन्तरविरोध पदको लडाइँ नभएको पनि बताए। 'पद र प्रतिष्ठाको लडाइँ होइन। नेतृत्वको लडाइँ होइन। वैचारिक मान्यतासँग जोडिएका विषयको लडाइँ हो,' नेपालले भने, 'विधि र आचरणको विषयसँग जोडिएको अन्तरविरोध हो।'
पूर्वप्रधानमन्त्री ओलीले २–२ पटक संसद भंग गरेर अदालतबाट पुन:स्थापना हुँदा नैतिक दायित्व पनि नबोकेको नेपालले टिप्पणी गरे। 'यत्रो हुँदाखाँदाको संसद् पटक–पटक भंग गरियो। एउटै प्रधानमन्त्रीले संसद्लाई पटकपटक सिध्याएको छ, तर ब्युँतिएपछि नैतिक दायित्व पनि बोक्दैन,' नेपालले भने।
नेता नेपालले प्रधानमन्त्री देउवालाई विश्वासको मत दिने २२ जना एमालेका सांसदहरु 'योद्धा' भन्दै प्रशंसा गरे। '२२ जना योद्धाहरुलाई म विशेष सम्मान गर्न चाहन्छु। ११ जनालाई पनि अभिवादन गर्न चाहन्छौं,' नेपालले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
