काठमाडौं– नेकपा माओवादी केन्द्रका नेता एवम् प्रतिनिधि सभा सदस्य (सांसद) हरिबोल गजुरेलले प्रतिनिधि सभाका लागि २–२ पटक अदालत जानुपर्ने अवस्था सिर्जना गर्नेले नै अहिले अदालतको फैसलामाथि प्रश्न उठाइरहेको टिप्पणी गरेका छन्।
शुक्रबार प्रतिनिधि सभा बैठकमा बोल्दै नेता गजुरेलले संविधान बनाउन महत्वपूर्ण भूमिका हुनेको संविधान रक्षाको पनि दायित्व हुने भएकाले त्यसबाट भाग्न नमिल्न बताए। ‘पहिलोपटक (५ पुस २०७७मा) संसद विघटन हुँदा नेकपाभित्र छलफल भयो? सचिवालयमा छलफल भयो?' गजुरेलले प्रश्न गरे, 'पार्टीभित्र छलफल नै नगर्ने, यही हो दलीय व्यवस्था? यही हो अनुशासन? कसले मान्ने हो अनुशासन? आफू पालना नगर्ने अनि अरुले मानिदिनुपर्ने?’
लिखित सम्झौतालाई बेवास्ता गर्ने अनि अहिले जे भनेपनि जनताले पत्याउने कुरा हुन नसक्ने गजुरेलले टिप्पणी गरे। नेता गजुरेलले निवर्तमान प्रधानमन्त्री केपी शर्मा ओलीले अहिलेसम्म प्राप्त राजनीतिक उपलब्धि उल्ट्याउन खोजेका कारण अहिलेको अवस्था आएको टिप्पणी गरे।
पुरानै (राजतन्त्रात्मक) अवस्थामा देशलाई फर्काउने गलत प्रयास र संविधानको उपलव्धी समाप्त गर्न लागेकाले त्यस्ता व्यक्तिलाई हटाएर संसदका सदस्यहरुको बहुमतले शेरबहादुर देउवालाई नयाँ प्रधानमन्त्री बनाएको गजुरेलले दाबी गरे।
‘अदालतले संविधानको ब्याख्या मात्र गरेको हो । संविधानको ब्याख्या कसले गर्ने हो?’ उनले भने ‘दुई–दुई पटक अदालत जाने अवस्थाको सिर्जना कसले गरेको हो? ’
सबै मिलेर देशलाई संकटबाट बचाएर संसद पुन:स्थापना गर्न भूमिका खेलेको गजुरेलले दाबी गरे।
प्रधानमन्त्री देउवालाई अवसर प्राप्त भएको बताउँदै नेता गजुरेलले आफू हार्ने अवस्था हुँदा हुँदै गिरिजाप्रसाद कोइरालाले निर्वाचन गराएको विषय पनि संसदमा स्मरण गरे।
गजुरेलले विगतका कुराहरुको समीक्षा गरेर देशलाई समुन्नत बनाउने काम हुने उनले बताए । गजुरेलले कोभिड १९ को महामारीबाट पार पाउने विषयलाई सरकारले पहिलो प्राथमिकतामा राखेर काम गर्नुपर्ने सुझाव दिए।
यसअघि (केपी शर्मा ओलीको पालामा) संघीयताको अभ्यास नभएकाले अब संघीयताको अभ्यास हुने पनि गजुरेलले आशा व्यक्त गरे।
सरकारले शान्ति प्रक्रियाका बाँकी कार्य पनि टुंग्याउनुपर्ने र भ्रष्टाचार नियन्त्रण गर्ने कुरामा पनि सफल हुन गजुरेलले शुभकामना दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
