काठमाडौं- गृह मन्त्रालयले नेकपा (माओवादी केन्द्र)का अध्यक्ष तथा पूर्वप्रधानमन्त्री पुष्पकमल दाहाल 'प्रचण्ड' को सुरक्षामा थप प्रहरी टोली खटाएको छ। गृहमन्त्री बालकृष्ण खाँणको निर्देशनमा सचिवस्तरीय निर्णयबाट प्रचण्डको सुरक्षामा डीएसपीको कमाण्डमा थप प्रहरी टोली खटाइएको हो।
प्रहरी प्रधान कार्यालय स्रोतले दिएको जानकारी अनुसार यो समाचार तयार पार्दासम्म गृहको निर्देशनपछि प्रचण्डको सुरक्षामा डीएसपी विनोद घिमिरे खटिइसकेका छन्। अन्य थप प्रहरी टोली भने खटिइसकेका छैनन्। गृहको निर्देशन अनुसार केही दिनमै थप ९/१० जनाको प्रहरी टोली खटाउने तयारी प्रहरी प्रधान कार्यालयले गरेको छ।
गृह मन्त्रालयले नै जारी गरेको विशिष्ट व्यक्तिको सुरक्षा मापदण्ड २०७७ विपरीत प्रचण्डको सुरक्षामा थप सुरक्षाकर्मी खटाइएको हो। उक्त मापदण्ड अनुसार पूर्वप्रधानमन्त्रीको सुरक्षामा १८ जना मात्रै सुरक्षाकर्मी राख्न मिल्ने उल्लेख छ।
अति विशिष्ट तथा विशिष्ट व्यक्तिहरुले आवश्यकभन्दा बढी सुरक्षाकर्मी राखेर दुरुपयोग भएको पाइएपछि यो मापदण्ड लागू गरिएको थियो। त्यसपछि उनीहरुको अगुवा पछुवालाई गृहले तानेको थियो।
अहिले फेरि सुरक्षा 'थ्रेट' भन्दै एकाएक सुरक्षाकर्मी थप गर्न थालिएको छ। यसबारे प्रहरी प्रधान कार्यालय भने कुनै विशिष्ट व्यक्तिलाई सुरक्षा थ्रेट भएकाले सुरक्षाकर्मी थप भएको भन्न सक्दैन। हेडक्वार्टर स्रोत भन्छ– ‘गृहबाट सुरक्षाकर्मी थप गर्नू भनेर परिपत्र आएपछि हामीले थप गरेका हौं। सुरक्षा थ्रेट भएरै गृहले सिफारिस गरेको होला।’
सुरक्षासम्बन्धी मापदण्ड २०७७ अनुसार सुरक्षाकर्मी थप गर्नु परेको अवस्थामा सुरक्षा चुनौती छ/छैन भनेर मूल्यांकन हुनुपर्ने र चुनौती भएको निष्कर्ष निस्किए केन्द्रीय सुरक्षा समितिले निर्णय गरेपछि सुरक्षाकर्मी थप हुने सक्ने उल्लेख छ। तर, चुनौती मूल्यांकन नै नगरी शेरबहादुर देउवा नेतृत्वको सरकारले प्रचण्डको सुरक्षामा थप प्रहरी टोली खटाएको छ।
उता पूर्वप्रधानमन्त्री तथा नेकपा (एमाले)का वरिष्ठ नेता माधवकुमार नेपालको सुरक्षामा समेत थप प्रहरी टोली खटाउने तयारी भएको स्रोतले नेपाल लाइभलाई जानकारी दिएको छ। तर, यसबारे आफूलाई केही थाहा नभएको दाबी गृह प्रवक्ता तथा सहसचिव जनकराज दाहालले गरे। उनले भने- ‘यो विषय मेरो जानकारीमा छैन।’
प्रचण्ड र नेपालको सुरक्षा चुनौती बढेको हो/होइन? बढेको भए के कारण सुरक्षा चुनौती बढ्यो भन्ने निष्कर्ष निकालेपछि मात्रै सुरक्षाकर्मी थप हुनुपर्ने पूर्वडीआईजी हेमन्त मल्ल ठकुरी बताउँछन्।
पछिल्लो राजनीतिक घटनाक्रम र पार्टीभित्रकै अन्तरविरोधले नेतामाथि सुरक्षा थ्रेट हुनु स्वाभाविक भएको ठकुरीको भनाइ छ। आन्तरिक सुरक्षाको पहिलो जिम्मा नेपाल प्रहरीको हुनु र पछिल्लो राजनीतिक घटनाक्रमले सुरक्षा थ्रेट बढ्दा नेताहरुमाथि केही भइहालेमा प्रहरीमाथि प्रश्न उठ्ने भएकाले थप सुरक्षाकर्मी खटाइएको हुनसक्ने उनको विश्लेषण छ।
प्रचण्डको हकमा भने अघिल्लो पटक सुरक्षाकर्मी घटाइँदा पूर्वलडाकू समेत सुरक्षामा खटिएका थिए। पूर्वलडाकू सुरक्षामा खटिँदा प्रहरीको मनोबल समेत खस्कने भएकाले पूर्वलडाकू हटाउने नीति अनुसार थप सुरक्षाकर्मी खटाइएको हुनसक्ने ठकुरीको विश्लेषण छ।
सुरक्षा मापदण्ड लागू भएपछि प्रचण्डको सुरक्षामा खटिएका सुरक्षाकर्मीको संख्या घटाइएपछि 'पूर्वजनमुक्ति सेना' तथा हालको वाईसीएलका नेता प्रकाशचन्द्र पाण्डेको नेतृत्वमा एक सेक्सन पूर्वलडाकू प्रचण्डको सुरक्षामा खटिएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
