काठमाडौं– प्रधानमन्त्री तथा मन्त्रिपरिषद्को कार्यालयमा जारी सत्ता पक्षीय ५ दलीय गठबन्धनको बैठक सकिएको छ।
अपराह्न ४ बजे शुरु भएर करिब २ घण्टा बसेको बैठकमा सरकार सञ्चालन र मन्त्रिपरिषद् विस्तारका विषयमा छलफल भएको नेताहरुले जानकारी दिएका छन्।
प्रधानमन्त्री कार्यालय सिंहदरबारमा जारी बैठकमा प्रधानमन्त्री एवम् कांग्रेस सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल (प्रचण्ड), जनता समाजवादी पार्टीका अध्यक्ष उपेन्द्र यादव, राष्ट्रिय जनमोर्चाका अध्यक्ष चित्रबहादुर केसी सहभागी भएका छन्।
नेकपा एमालेका वरिष्ठ नेता माधव कुमार नेपाल भने गठबन्धनको बैठकमा सहभागी भएनन्। नेपाल पक्षबाट एमाले नेता विजय पौडेल सहभागी भएका जनाइएको छ।
बैठकमा सहभागी जसपा अध्यक्ष उपेन्द्र यादवले समसामयिक राजनीति र सरकार सञ्चालनका विषयमा छलफल भएको जानकारी दिए।
यस्तै, सरकार सञ्चालनका लागि उच्चस्तरीय राजनीतिक संयन्त्र निर्माण गर्ने भन्ने विषयमा पनि छलफल भएको उनले जानकारी दिए। तर, कुनै पनि विषयमा निर्णय नभएको यादवको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
