फाइल तस्वीर।
काठमाडौं- प्रधानमन्त्री शेरबहादुर देउवाले बहुमत पुग्ने परिपक्व अवस्था बनेपछि मात्र विश्वासको मत लिने दिन तय गर्ने भएका छन्।
प्रधानमन्त्री देउवाले नियुक्त भएको मितिले ३० दिनभित्र प्रतिनिधि सभाबाट विश्वासको मत लिनुपर्ने हुन्छ। त्यसका लागि उनलाई अब २८ दिन मात्रै बाँकी छ। साउन २८ भित्र विश्वासको मत लिनुपर्ने उनलाई संवैधानिक बाध्यता छ। सरकारी पक्षका नेताहरुले देउवालाई विश्वासको मत पुग्ने दाबी गरेका छन्।
त्यसका लागि विश्वासिलो आधार भने तय भइसकेको छैन। ‘विश्वासको मत प्राप्त हुने वातावरण बनाएर दिनको निश्चित गर्ने हो’, देउवानिकट कांग्रेस नेता मीन विश्वकर्माले भने, ‘प्रधानमन्त्रीले सबै दलका नेताहरुसँग वार्ता छलफल अघि बढाउनुभएको छ। ३० दिनभित्रमा जुनबेला विश्वासको मतका लागि परिपक्व अवस्था आउँछ। त्यतिबेला विश्वासको मत लिनुहुन्छ।’ प्रतिनिधि सभाको पूर्णकालीन अवधिका लागि एमाले वरिष्ठ नेता माधवकुमार नेपाल पक्षको साथ रहने उनले विश्वास व्यक्त गरे।
दलहरुमा छलफलको क्रम सुरु गरेका प्रधानमन्त्री देउवाले एमाले नेता नेपाललाई बुधबार उनकै निवास कोटेश्वरमा भेटेका थिए। विश्वासको मत दिएर सरकारमा सहभागी हुन उनले नेपाललाई आग्रह गरेका थिए। बैठकमा सहभागी नेपाल पक्षका नेता विरोध खतिवडाले देउवा सरकारको पूरा कार्यकाल हुने दाबी गरे। ‘रिटमै संसद् पूर्णकाल चल्नपर्छ भनेर हामीले लेखेका थियौं’, खतिवडाले भने, ‘संसद् पूर्णकाल चलाउन खोजेको भनेर हामीले भनिसकेपछि अरु थप कुरा केही भन्नुपर्ने छ र?’
माधव पक्षका केही नेता संसद्को पूर्ण कार्यकालका लागि विश्वासको मत दिनुपर्ने लाइनमा छन्। खतिवडासहित झपट रावल, रामकुमार झाँक्री, मेटमणि चौधरीसहितका सांसदहरू विश्वासको मत दिनुपर्ने पक्षमा छन्। खतिवडाले भने, ‘पूर्णकार्यकाल संसद् नखोज्ने हो भने मंसिरमा ओलीले चुनाव भनेकै थिए त! त्यसमै चुनावमा गएको भएको हुन्थ्यो। चुनावमा जाने भएको भए रिटमा हामीले पूर्ण कार्यकालको माग गर्ने थिएनौं।’ विश्वासको मत दिने भनी प्रष्ट नबोलेपनि उनले संसदको पूर्ण कार्यकालका लागि आवश्यक पर्ने कार्य गर्ने बताए। उनले देउवालाई विश्वासको मत दिने संकेत गरे।
विश्वासको मत दिएपनि सरकारमा सहभागी नहुने माधव पक्षका केही नेताको अभिव्यक्ति छ। विश्वासको मत दिँदा पार्टीको कारबाही भोग्न समेत तयार रहेको खतिवडाले बताए। ‘ओलीले कारबाही गर्छु भनेको सुनेको धेरैचोटी भयो’, खतिवडाले भने, ‘हाम्रा लागि फागुन २३ देखि नै ठाउँ छैन भनेका हुन्। कारबाही गर्दै फुकुवा गर्दै गरेका छन्।’
प्रतिनिधि सभामा अहिले २७१ जना सदस्य कायम छन्। बहुमतका लागि १३६ जनाले उनलाई मत दिनुपर्ने हुन्छ। तर, देउवाको पक्षमा कांग्रेसका ६१, माओवादी केन्द्रका ४८, जनता समाजवादी (उपेन्द्र पक्ष) का १२, जनमोर्चाका १ र स्वतन्त्र १ जना गरी १२३ मत देखिएको छ। यसअनुसार देउवालाई थप १३ सांसद् आवश्यक पर्ने देखिन्छ। १३ जनाका लागि देउवाले माधव पक्ष पा जसपाको महन्थ ठाकुर र राजेन्द्र महतो पक्षको साथ लिनुपर्दछ।
सर्वोच्च अदालतले साउन ३ गते साँझ ५ बजे प्रतिनिधि सभाको बैठक बोलाउन आदेश दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770103362.jpg)
-1764146706.png)
