फाइल तस्वीर
काठमाडौं- सरकार सञ्चालन, मन्त्रालयको भागबण्डा लगायतका विषयमा छलफल गर्न पाँच दलीय गठबन्धको बैठक बस्न लागेको छ। गठबन्धमा रहेको नेपाली कांग्रेसका सभापति शेरबहादुर देउवा प्रधानमन्त्री बनेसँगै गठबन्धनका दलहरु सत्ता सञ्चालन, मन्त्रालय भागबन्डा लगायतका विषयमा छलफल गर्न बैठक बस्न लागेका हुन्।
नेकपा माओवादी केन्द्रका नेता देवेन्द्र पौडेलले गठबन्धनका दलहरुबीचमा छलफल गर्ने तयारी भइरहेको बताए। 'आज गठबन्धनमा छलफल गर्ने भन्ने भएको छ, तर समय तय भइसकेको छैन,' पौडेलले भने, 'सम्भवत: समय दिउँसो तय होला।'
देउवाको नेतृत्वमा सरकार गठन भएसँगै उनले आफ्नो दल नेपाली कांग्रेस र माओवादीबाट दुई/ दुई जनालाई सहभागी गरेर सरकार बनाएका छन्। अब अन्य मन्त्रालयहरुका बारेमा टुंगो लगाउन गठबन्धनमा छलफल हुनेछ।
तर, एमालेको नेपालपक्ष र जनता समाजवादी पार्टी(जसपा) सरकारमा सहभागी हुनेबारे टुंगो लागिनसकेकाले गठबन्धनलाई तत्काल मन्त्रालय टुंगो लगाउन भने सजिलो छैन। बुधबार प्रधानमन्त्री देउवाले नेता नेपालको निवास पुगेर सरकारमा सहभागी हुन आग्रह गरेका थिए।
सरकार सञ्चालनका लागि नेकपा माओवादी केन्द्रले उच्चस्तरीय संयन्त्र गठनको माग गरेको छ। गठबन्धनको बैठकमा त्यसबारेमा पनि छलफल हुने जनाइएको छ।
गठबन्धनको छलफलमा नेकपा एमालेका वरिष्ठ नेता माधव नेपाल पक्ष सहभागी हुने नहुनेबारे स्पष्ट नभएको नेता पौडेलले बताए।
सर्वोच्च अदालतले संसद पुन: स्थापना गर्दै शेरबहादुर देउवालाई प्रधानमन्त्रीमा नियुक्त गर्न परमादेश जारी गरेपछि बसेको गठबन्धनको बैठकमा एमाले वरिष्ठ नेता नेपालले आफूहरु गठबन्धनबाट बाहिरिएको बताएका थिए।
गठबन्धनमा नेपाली कांग्रेस, माओवादी केन्द्र, नेकपा एमालेको माधव नेपालपक्ष, जसपा र राष्ट्रिय जनमोर्चा रहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770103362.jpg)
-1764146706.png)
