काठमाडौं- पार्टी सभापति शेरबहादुर देउवाले पदीय जिम्मेवारीमा महत्व नदिएको भन्दै गुनासो गर्दै आएका कांग्रेस नेता बालकृष्ण खाँणले शक्तिशाली मन्त्रालय पाएका छन्।
मंगलबार गठन भएको गठबन्धन सरकारमा देउवाले गृह मन्त्रालयको जिम्मेवारी खाँणलाई दिएका छन्। गृह मन्त्रालय बाहेक अन्य मन्त्रालयको जिम्मेवारी नलिने अडान राखेका खाँणको माग पूरा गर्न देउवाले सत्ता सहयात्री माओवादी केन्द्रलाई समेत मनाएका छन्। गृह मन्त्रालयमा यसअघि माओवादी केन्द्रले दाबी गरेको विषय सार्वजनिक भएको थियो।
माओवादीलाई अर्को प्रभावशाली (अर्थ) मन्त्रालय दिएर देउवाले खाँणलाई गृहमन्त्री बनाएका हुन्। खाँणले १३औं महाधिवेशनपछि नै पार्टीमा 'सम्मानजनक' भूमिका खोजिरहेका थिए। पार्टीमा पदाधिकारी मनोनित गर्दा समेत देउवाले आफूलाई महत्व नदिएको भनेर खाँणले गुनासो गर्दै आएका थिए।
देउवाले उपसभापतिमा विमलेन्द्र निधि, महामन्त्रीमा पूर्णबहादुर खड्का र सहमहामन्त्रीमा डा प्रकाशशरण महतलाई स्थान दिँदा खाँण भने 'छुटेका' थिए।
पदाधिकारी हुन नपाएका खाँणले सभापतिसँग पार्टीमा उपल्लो तहको भूमिका खोजिरहेका थिए। देउवाले उनलाई संसदीय दलको प्रमुख सचेतक बनाएका थिए। तर, प्रमुख सचेतक आफ्ना लागि रुचीको पद नभएको भनेर पनि खाँणले पटक-पटक आफ्ना निकटस्थहरुसँग बताउने गरेका थिए।
खाँणले पार्टीमा आफ्नो सम्मानजनक भूमिका नभएको अवस्थामा भातृ संगठनमा निकटस्थलाई सम्मानजनक भूमिका दिइनुपर्ने अडान पनि देउवासमक्ष राखेका थिए। खाँणले नेपाल विद्यार्थी संघको तदर्थ समितिको अध्यक्ष आफू निकटलाई बनाउन खोजेका थिए। तर, देउवाले उनको मागलाई सम्वोधन गरेनन्।
देउवाले आफ्ना सबै आग्रहलाई बेवास्ता गरेको भन्दै खाँण पछिल्लो समय असन्तुष्ट बन्दै गएका थिए। देउवाप्रतिको असन्तुष्टिलाई खुला रुपमा 'जाहेर' गर्नका लागि खाँणले आसन्न महाधिवेशनमा महामन्त्री पदको उम्मेदवारमा दाबी गर्न थालेका थिए।
नेपाल विद्यार्थी संघ र तरुण दलको अध्यक्ष रहिसकेका खाँणको देउवा गुटभित्रै आफ्नो छुट्टै 'उपगुट' पनि छ। जसका कारण खाँणलाई महामन्त्रीको उम्मेदवार 'बनाउनै पर्ने' दबाब देउवालाई थियो।
स्रोतका अनुसार खाँणले पछिल्लो समय महामन्त्री नदिए गुट परिवर्तन गर्नेसम्मको 'घुर्की' देउवालाई लगाउने गरेका थिए। आसन्न महाधिवेशनको रणनीतिलाई सफल बनाउन र चुनावलाई समेत मध्यनजर गरेर देउवाले गृह मन्त्रालय खाँणलाई सुम्पेका छन्।
खाँणलाई गृह मन्त्रालय सुम्पिएपछि देउवालाई महाधिवेशनमा आफू पक्षीय अरु नेतालाई व्यवस्थापन गर्न केही सहज हुने भएको छ। महामन्त्रीको दाबी गर्दै आएका उनलाई गृह मन्त्रालय जिम्मा लगाएर देउवाले उक्त पदमा अर्को व्यक्तिलाई स्थान दिने अवस्था बनेको छ।
गृहमन्त्रालयको जिम्मेवारी प्राप्त गरेका उनले अब महामन्त्रीको दाबी नगर्ने देउवा क्याम्पका अरु नेताको आकलन छ।
बिगतमा शिक्षा राज्यमन्त्री, सिंचाइ मन्त्री र रक्षा मन्त्री गरी तीन पटक सरकारमा सहभागी भएको अनुभव संगालेका छन् खाँणले। रुपन्देहीबाट विगतमा तीनपटक प्रत्यक्षतर्फ चुनाव जितेका उनी अहिले भने समानुपातिक सांसद हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
