काठमाडौं–नेकपा एमालेको स्थायी कमिटी बैठक आज बस्दैछ। आइतबार अपराह्न बस्ने भनिएको स्थायी कमिटी बैठक स्थगित गरि आजका लागि बोलाइएको एमाले केन्द्रीय कार्यालय सचिव शेरबहादुर तामाङले जानकारी दिए। बैठक आज अपराह्न ५ बजे बस्ने तामाङले जानकारी दिए।
एमालेका दोस्रो तहका नेताहरु सम्मिलित एकता कार्यदलस्तरमा आन्तरिक विवाद समाधानका लागि छलफल भइरहेको अवस्थामा अध्यक्ष केपी शर्मा ओलीले आइतबार स्थायी कमिटी बैठक डाकेका थिए। तर कार्यदल सहमति नजिक पुगेपछि ओलीले बैठक स्थगित गरेका थिए।
पार्टीमा देखिएको विवाद समाधानका लागि अध्यक्ष ओली र वरिष्ठ नेता माधवकुमार नेपाल पक्षका नेताहरु सम्मिलित कार्यदलले आइतबार राति १० बुँदे सहमति गरेको छ। सहमति भएसँगै आजका लागि बोलाइएको स्थायी कमिटी बैठकमा नेता नेपालपक्षका नेताहरु सहभागी हुने सम्भावना रहेको छ।
नेकपा एमाले र माओवादी केन्द्रलाई सर्वोच्च अदालतले ब्युँइताइदिएपछि एमाले अध्यक्ष ओलीले बोलाएको बैठकमा नेता नेपाल पक्ष सहभागी हुने गरेको थिएन। तर, आजको बैठकमा भने नेपालपक्ष सहभागी हुने सम्भावना रहेको छ।
एकता कार्यदलले गरेको सहमतिअनुसार सबै कुरा अगाडि बढे वरिष्ठ नेता नेपाल स्थायी कमिटी बैठकमा सहभागी हुने भएका हुन्। उक्त बैठकमा आफू पनि सहभागी हुने संकेत नेपालले गरेका छन्।
उनले सोमबार सर्वोच्च अदालतले प्रतिनिधि सभा विघटन सम्बन्धी मुद्दामा फैसला गर्ने मिति तोकेकाले फैसला आएपछि बस्ने बैठकमा आफूहरु सहभागी हुनसक्ने उल्लेख गरे।
'आइतबार भएको सहमतिको कुरा पनि त्यही हो, सर्वोच्च अदालतमा बुझाएको हस्ताक्षर र सर्वोच्चको फैसला प्रभावित हुनेगरी केही नगर्ने, केही नबोल्ने', नेपालले भने, 'त्यसको अर्थ भोलि सर्वोच्चले फैसला गर्यो भने त्यसपछि पार्टीमा बसेर कुरा गर्ने हो। त्यो भनेको स्थायी कमिटीको बैठक बस्ने हो। फैसलाबारे समीक्षा गर्ने, त्यसलाई पार्टीले कुन रुपमा लिने भन्नेबारे त्यहीँ निर्णय हुन्छ। हामी त्यहीँ बसेर छलफल र निर्णय गर्छौं।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
