काठमाडौं– नेकपा एमालेको विवाद समाधानका लगि गठित कार्यदलको शुक्रबार बिहान ११ बजे बस्ने भनेको बैठक ढिलो गरी सिंहदरबारमा सुरु भएको छ।
बिहीबार साँझ बसेको बैठक विषयमा प्रवेश नै नगरी स्थगित भएको थियो। त्यसअघि बिहीबार बिहानको बैठक पनि साँझसम्मका लागि स्थगित गरिएको थियो। बिहीबार साँझको बैठकबाट उठ्दा नेताहरुले शुक्रबार बिहान ११ बजे बैठक बस्ने बताएका थिए।
बैठकअघि आन्तरिक गृहकार्य गर्नुपर्ने भएकाले केही समय लागेको नेताहरुले बताएका छन्। एमाले अध्यक्ष केपी शर्मा ओलीपक्षका कार्यदल सदस्यहरु केही चाँडो सिंहदरबार पुगे पनि वरिष्ठ नेता माधवकुमार नेपालतर्फका कार्यदल सदस्यहरु पौने एक बजे मात्र आइपुगेपछि बैठक ढिलो गरी सुरु भएको हो।
बिहीबार साँझको बैठकबाट निस्कने क्रममा नेपालपक्षका कार्यदल सदस्य घनश्याम भुसालले १० दिनयताका बैठक र वार्तामा कुनै प्रगति नभएको बताएका थिए। तर, कार्यदलका ओलीतर्फका सदस्य सुवास नेम्वाङले भने शुक्रबार सहमति जुट्न सक्ने बताएका थिए।
कार्यदलका सदस्यहरुले आफ्नो तर्फबाट ‘अजेण्डा’मा लगभग सहमति जुटिसकेको र त्यसलाई ‘फाइनलाइज’ गर्नमात्र बाँकी रहेको बताउँदै आएका छन्। केही न केही ‘ब्रेक थ्रू’ गर्नसक्ने अवस्थामा कार्यदल रहेको एक सदस्यले बताए।
बैठकमा नेपाल पक्षबाट उपाध्यक्ष भीम रावलको नेतृत्वमा उपमहासचिव घनश्याम भुसाल, सचीव गोकर्ण विष्ट, स्थायी कमिटीका सदस्य सुरेन्द्र पाण्डे, र रघुजी पन्त तथा भीम आचार्य लगायत ६ जना र ओली पक्षबाट सुवासचन्द्र नेम्वाङको नेतुत्वमा उपमहासचिव बिष्णु प्रसाद पौडेल, सचिव प्रदीप कुमार ज्ञवाली, स्थायी कमिटी सदस्य शंकर पोखरेल, बिष्णु रिमाल लगायत ११ जनाको उपस्थिति रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
