काठमाडौं– नेकपा एमालेका स्थायी कमिटी सदस्य सुवासचन्द्र नेम्वाङले पार्टी एकताको सन्दर्भमा सकारात्मक संकेतहरु देखिएको बताएका छन्।
बिहीबार सिंहदरबारमा भएको पार्टी एकता कार्यदलको बैठकपछि सञ्चारकर्मीसँग बोल्दै नेता नेम्वाङले आफूहरु पार्टीलाई एकताबद्ध भएको घोषणा गर्न लागिरहेको बताए।
‘जे भइरहेको छ, ठीक भइरहेको छ। हामी यसलाई निष्कर्षमा पुर्याउन कटिबद्ध छौं,’ पार्टी एकताबारे भइरहेका छलफलबारे जानकारी दिँदै नेम्वाङले भने।
अध्यक्ष केपी शर्मा ओली र वरिष्ठ नेता नेपालको हस्ताक्षरसहित संयुक्त वक्तव्य जारी गर्ने भनेर भइरहेको तयारीबारे सोधिएको प्रश्नमा नेम्वाङले त्यो विषय ठूलो नभएको बताए।
‘संयुक्त विज्ञप्ती त सानो कुरा हो, हामी पार्टीलाई एकताबद्ध भएको घोषणा गर्न लागिरहेका छौं,’ नेम्वाङले भने।
आफूहरुबीच निरन्तर छलफल जारी रहेको र गम्भीर छलफल भइरहेको पनि नेता नेम्वाङले जानकारी दिए। ‘हाम्रो निरन्तर छलफल जारी छ, छलफल गम्भीर छ,’ नेम्वाङले भने, ‘छलफल सकारात्मक छ, यसलाई निष्कर्षमा पुर्याउने हाम्रो जोड छ।’
नेता नेम्वाङले एकताको विषयमा शीर्ष नेताहरुसँग फेरि पनि छलफल हुनसक्ने बताए। ‘शीर्ष नेताहरुसँग हिजो (बुधबार) पनि छलफल भयो। आज (बिहीबार) पनि उहाँहरुसँग निश्चय पनि हेलो हुन्छ, भेटघाट हुन्छ,’ नेम्वाङले भने।
नेता नेम्वाङले फेरि तयारी गरेर एकता कार्यदलका सदस्यहरुको बैठक आज (बिहीबार) बेलुकी ७ बजे पुनः बस्ने जानकारी दिए। ‘७ बजेसम्म तयारी पूरा हुन्छ, ७ बजे हामी बस्छौं,’ नेता नेम्वाङले भने।
नेता नेम्वाङले बुधबारजस्तै शीर्ष नेताहरु (अध्यक्ष ओली र वरिष्ठ नेता नेपालबीच) पुनः छलफल हुनसक्ने बताए। ‘शीर्ष नेताहरुबीच संवाद, छलफल ठूलो कुरै भएन, हुन सक्छ,’ नेम्वाङले भने।
नेता नेम्वाङले बुधबार ओली र नेपालबीच सकारात्मक छलफल भएको र त्यसले पुनः निरन्तरता पाउने दाबी गरे। ‘कार्यदलको बैठक ७ बजे बस्छ, नेताहरुबीच सकारात्मक छलफल भएको छ,’ नेता नेम्वाङले भने, ‘सकारात्मक छलफल भएको थिएन भने फेरि केही तयारी गरेर ७ बजे बस्छौं भनेर किन भन्थ्यौं र?’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
