काठमाडौं– स्थानीय प्रशासनले कर्फ्यू जारी गर्दा समेत चितवनको राप्ती नगरपालिका–३ की सुजिता भण्डारीका लागि न्याय माग गर्दै भइरहेको आन्दोलन जारी रहेको छ।
आइतबार राप्ती नगरपालिकाकै ब्रह्मस्थानी सामुदायिक जंगलमा शव फेला परेकी भण्डारीका लागि न्याय माग गर्दै स्थानीयले विरोध प्रदर्शन गरेपछि मंगलबार साँझदेखि लागू हुने गरी कर्फ्यू आदेश जारी गरिएको थियो।
जिल्ला प्रशासन कार्यालय चितवनले पूर्व–पश्चिम राजमार्गअन्तर्गत राप्ती नगरपालिका–१ लोथरपुलदेखि राप्ती नगरपालिका–४ डढुवा सम्मको राजमार्गको दायाँ बायाँ ५०० मिटर भित्र पर्ने क्षेत्रमा कर्फ्यू आदेश जारी गरेको थियो ।
लोथरपुलदेखि डढुवा खोलासम्म कर्फ्यू लगाइए पछि स्थानीयले बुधबार खैरहनीमा प्रदर्शन गरेका छन्। पूर्व–पश्चिम राजमार्गअन्तर्गत पर्ने खैरहनी नगरपालिका–१ शाही चोकमा टायर बालेर सडक अवरुद्ध पार्दै स्थानीयले विरोध प्रदर्शन गरेका हुन्।
यस्तै, खैरबहनी नगरपालिकास्थित साइ चोकमा पनि युवाहरुले टायर बालेर प्रदर्शन गरेका छन्। भण्डारीको हत्या भएको र हत्यामा संलग्नहरुलाई कारबाही माग गर्दै स्थानीयले प्रदर्शन गर्न थालेका हुन्।
साथीको घर जान्छु भनेर असार ११ गते बिहान ६ बजेतिर घरबाट निस्किएकी २३ वर्षीया सुजिताको १० दिनपछि आइतबार जंगलमा शव फेला परेको थियो। जंगलमा च्याउ टिप्नका लागि गएका स्थानीयले शव देखेपछि प्रहरीलाई खबर गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
