काठमाडौं- चितवनको राप्ती नगरपालिका-३ कि २३ वर्षीया सुजिता भण्डारीको मृत्यु घटना रहस्यमय बनेको छ। साथीको घर जान्छु भनेर असार ११ गते बिहान करिब ६ बजे निस्केकी भण्डारीको शव १० दिनपछि जंगलमा भेटिएको छ।
राप्ती नगरपालिकाकै ब्रम्हस्थानी सामुदायिक जंगलमा च्याउ टिप्न गएका स्थानीयले आइतबार शव देखेपछि प्रहरीलाई खबर गरेका थिए। त्यसपछि प्रहरी घटनास्थल पुगेको थियो। स्थानीयले देखेको उक्त शव असार ११ गतेदेखि हराइरहेकी भण्डारीको भन्दै आफन्तले सनाखत गरेका थिए।
सम्पर्कविहीन भएपछि अपहरणमा परेको जानकारी
असार ११ गतेबाट सम्पर्कविहीन भएपछि उनले सोही दिन करिब १२ बजे अन्तिम कल दिदीलाई गर्दै आफूलाई ३ जनाको समूहले अपहरण गरेर लगेको बताएकी थिइन्। अपहरणमा परेको जानकारी गराएपछि उनको परिवारले यसबारे प्रहरीलाई पनि जानकारी गराएको थियो।
त्यसपछि केन्द्रीय अनुसन्धान ब्यूरो (सीआईबी) समेतको सहयोगमा घटनाको अनुसन्धान भएको थियो। विभिन्न प्राविधिक पाटोको अनुसन्धान गर्दा पनि सीआईबीले अपहरणबारे कुनै सुराक पाउन सकेको थिएन।
यसबारे सीआईबीका प्रवक्ता तथा एसपी गंगा पन्तले भनिन्, ‘अपहरण भन्ने जानकारी आएपछि हामीले पनि विभिन्न टेक्निकल पाटोबाट अनुसन्धान गरेका थियौं। तर, अपहरणबारे कुनै सुराक पाउन सकिएन।’
अपहरण भएको भनेर जानकारी गराए पनि कसैले फिरौती माग नगरेको, मोबाइल लगायत विभिन्न प्राविधिक पाटोबाट अनुसन्धान गर्दा अपहरणको कुनै क्लू फेला नपरेकाले घटना रहस्यम नै रहेको प्रहरीले बताएको छ। घटनाका विषयमा प्रहरीले अनुसन्धान गरिरहेका बेला अन्ततः आइतबार भण्डारीको शव फेला पर्यो।
घटनास्थल नजिक बोतल र झोला
आइतबार जंगलमा शव भेटिएपनि प्रहरीले शव उठाएको थिएन। फरेन्सिक विज्ञ र तालिम प्राप्त कुकुरसहितको टोलीको पर्खाइमा शवलाई सुरक्षा दिएको प्रहरीले सोमबार मात्रै घटनास्थल मुचुल्का गरेर शव उठाएको थियो। शव सड्न थालिसकेकाले हराएको केही दिनमै मृत्यु भएको हुनसक्ने जिल्ला प्रहरी कार्यालय चितवनका एसपी ओम अधिकारी बताउँछन्।
शव भेटिएपछि घटनास्थल मुचुल्का गरेर उठाउने क्रममा शव नजिकै एउटा बोतल फेला परेको प्रहरीले जनाएको छ। उक्त बोतल कसरी त्यहाँ आयो, बोतलमा विषादी थियो वा अरु केहीको बोतल हो भन्नेबारे केही नखुलेको प्रहरीले जनाएको छ। शव नजिकै एउटा झोला पनि भेटिएको प्रहरी बताउँछ।
आफन्त भन्छन्- प्रहरीले अनुसन्धानमा लापरवाही गर्यो
सुजिताले आफू अपहरणमा परेको भनेर जानकारी गराएपछि प्रहरीलाई जानकारी गराउँदा समेत राम्रोसँग अनुसन्धान नगरेको आफन्तको आरोप छ। राम्रोसँग अनुसन्धान र खोजतलास नगर्दा नै सुजिताको हत्या भएको दाबी आफन्त र स्थानीयको छ।
प्रहरीको कमजोरीकै कारण सुजिताको हत्या भएको र दोषीलाई छानबिन गरी तत्कालै कानुनी दायरामा ल्याउनु पर्ने माग गर्दै स्थानीय अहिले प्रर्दशनमा उत्रिएका छन्। उनीहरूले पूर्वपश्चिम सडक समेत अवरुद्ध बनाएका छन्।
मत्युको कारण अपहरणपश्चात हत्या वा अन्य?
सुजिताले अपहरणमा परेको भन्दै फोन गरेपनि अपहरण नै हो होइन भन्ने अहिलेसम्म प्रहरीले केही निष्कर्ष निकाल्न सकेको छैन। अपहरण भनिए पनि कुनै फिरौती माग नभएको र प्राविधिक अनुसन्धानबाट अहिलेसम्म केही नखुलेको सीआईबीका प्रवक्ता पन्तले बताइन्।
यद्यपि, शव नजिक विषको जस्तो बोलत भेटिनुले सुजिताको मृत्यु हत्या वा अन्य कारणबाट भएको भन्न सक्ने अवस्था नरहेको प्रहरीले जनाएको छ। पोष्टमार्टम रिपोर्ट, फरेन्सिक जाँच लगायतबाट मृत्युको कारण खुल्ने प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
