काठमाडौं- जनता समाजवादी पार्टी (जसपा) विवाद निरुपण गर्न निर्वाचन आयोगले पाँच सदस्यीय इजलास गठन गरेको छ।
बुधबार प्रमुख निर्वाचन आयुक्त दिनेशकुमार थपलियासहित पाँच सदस्य इजलास गठन गरिएको हो। कुनै आयुक्त अनुपस्थित भएमा पनि इजलास गर्न बाधा नपर्ने भएको छ।
आयोगद्वारा इजलास गठन गर्ने निर्णय भएपछि जसपा दुबैपक्षलाई साउन ३ गते बोलाइएको प्रमुख निर्वाचन आयुक्त थपलियाले बताए। जसपाका दुबैपक्षले कानुन व्यवसायीलाई बोलाएर इजलाससमक्ष आ–आफ्नो पक्षबाट तर्क पेश गर्नेछन्।
मंगलबार आयोगले दुबैपक्षलाई बोलाएर छलफलसमेत गरेको थियो। दुबैपक्षले मिल्न नसक्ने भन्दै नियम कानुन बमोजिम विवाद निरुपण गर्न अध्यक्ष महन्थ ठाकुर र उपेन्द्र यादवले हस्ताक्षरसहित आयोगमा निवेदन दिएका थिए।
जसपामा ठाकुर र राजेन्द्र महतोसहित तत्कालीन राष्ट्रिय जनता पार्टीका नेताहरु एक कित्तामा उभिएका छन्। अर्कोतिर उपेन्द्र यादव र बाबुराम भट्टराईपक्ष उभिएका छन्।
प्रधानमन्त्री केपी शर्मा ओलीलाई समर्थन गर्ने वा नगर्ने भन्ने विषयलाई लिएर भएको विवाद पार्टी विभाजनको अवस्थामा पुगेको हो। अनौपचारिक रुपमा जसपा विभाजित भइसकेपनि आयोगले औपचारिक विभाजन भएको पत्र दिए लगतै उनीहरु औपचारिकरुपमा विभाजित हुने छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
