काठमाडौं– नेत्रविक्रम चन्द‘विप्लव’नेतृत्वको नेपाल कम्युनिस्ट पार्टीले संसद विघटन र पुन:स्थापनाको विषयमा जारी विवादलाई 'हड्डीको निम्ति कुकुहरुको लडाइँ' भएको टिप्पणी गरेको छ। आइतबार सञ्चारकर्मीहरुसँगको अन्तर्क्रियामा बोल्दै विप्लव नेतृत्वको नेकपाका प्रवक्ता खड्गबहादुर विश्वकर्मा ‘प्रकाण्ड’ले संसद विघटन र पुन:स्थापनासँग आफ्नो पार्टीको सरोकार नै नभएको बताए।
‘हामीले क्रान्तिको रक्षा गर्ने भनेको दलाल संसदीय व्यवस्थाको रक्षा वा राजतन्त्रलाई रक्षा गर्ने होइन। दलाल संसदीय व्यवस्थाको अन्त्य गर्ने हो। त्यसका लागि जनमतसंग्रहको कुरा उठाएका छौं। संसदवादी दलहरु आफ्नै तरिकाले लडिरहेका छन्। उहाँहरुको विषयमा प्रवेश गर्न चाहेका छैनौ’, विश्वकर्माले भने, ‘ओली र माधव नेपाल, ओली र प्रचण्ड जी, ओली र देउवाको झगडामा हामीले हात हाल्दैनौ। यो हड्डीको निम्ति कुकुरको लडाइँ भइरहेको छ। कुकुरहरु त्यहाँ झगडा गर्न जाने भए, मान्छेहरु जाँदैनन्। क्रान्तिकारी राजनीतिक पार्टीहरु जाँदैनन्। जानु पनि हुँदैन।’
संसद पुन:स्थापना भए पनि वा विघटन गरेर चुनावमा गए पनि संसदीय खेल आफूहरुका लागि ‘कागलाई बेल पाक्यो हर्ष न विस्मात’ जस्तै भएको विश्वकर्माले टिप्पणी गरे। ‘संसद विघटन र पुन:स्थापना हाम्रो सरोकारको विषय होइन। त्यो संसदीय व्यवस्था मान्ने दलहरुको मात्रै सरकोकार हो’, विश्वकर्माले भने।
गणतन्त्र, संघीयता, धर्मनिरपेक्षता, समावेशी मात्रै परिवर्तनको खुड्किलो नभएको उल्लेख गर्दै नेकपा प्रवक्ता विश्वकर्माले परिवर्तनको अजेण्डा नै नरहेको संसदीय व्यवस्थालाई विदेशीहरुले थोपरेको बताए।
‘गणतन्त्र, संघीयता, धर्मनिरपेक्षता, समावेशी मात्रै परिवर्तनको खुड्किलो थिएन। राजतन्त्रात्मक व्यवस्था अन्त्य गरेर दलाल संसदीय व्यवस्था ल्याउने अजेण्डा थिएन। राजतन्त्रको अन्त्य भएपछि दलाल संसदीय व्यवस्था नेपाली जनतालाई थोपर्न विदेशी शक्तिको षड्यन्त्र भयो,’ विश्वकर्माले भने।
संघीय व्यवस्थाविरुद्धको संघर्ष प्रचण्ड, मोहन वैद्य हुँदै अहिलेको नेकपा गठनसम्मको अवस्थामा आइपुगेको विश्वकर्माको भनाइ छ।
प्रवक्ता विश्वकर्माले आफूहरु भारतीय दबाबमा सरकारसँग सम्झौता गर्न आइपुगेको भनेर टिप्पणी हुने गरेको उल्लेख गर्दै त्यसप्रति आपत्ति जनाए। ‘मैले नाम लिन चाहन्नँ। कतिपय नेताहरुले महासचिव र प्रवक्ताको नामै लिएर भारतीयले दबाब र धम्की दिएर सहमति गरेर आए। यस्तो सिल्ली कुरा, पागल कुरा, ठगहरुको कुरा के हुन सक्छ?’ विश्कर्माले भने।
भारतीय हस्तक्षेपका विरुद्ध आफ्नो पार्टीले लेख्ने, बोल्ने र सघर्ष गर्दैं आएको विश्वकर्माले दाबी गरे। ‘राष्ट्रियताको सवाललाई लिएर एकदम निर्भिकताका साथ लड्ने हाम्रो पार्टी हो। यो पार्टी कुनै विदेशीले बनाइदिएको होइन। यो पार्टीमा विदेशी दलाल छैनन्। नेपाली जनताको पार्टी हो। त्यसले विदेशी हस्तक्षेपका विरुद्ध लड्न सकेको छौं’, विश्वकर्माले भने, ‘अरु हरेक पार्टीमा विदेशी दलालहरु छन्। त्यसैले भारतीयहरुले हस्तक्षेप गर्दा संसदीय पार्टीहरु लड्न सकेका छैनन ।’
ओली विरुद्ध लड्नका लागि प्रचण्ड, माधव नेपाल र शेरबहादुर देउवाले विदेशी शक्ति गुहार्ने गरेको पनि विश्वकर्माले टिप्पणी गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
